NAGSUGOD na ang pagpangandam karon sa mga Pinoy nga Bosconian alang sa pagbisita karong Disyembre sa relic ni St. John Bosco. Atong nasayran nga isulod kining relic og usa ka espesyal nga sudlanan ug isakay og espesyal nga sakyanan.

Adto moabot ang relic sa Syudad sa Bacolod ug mouna sa pagbisita sa Don Bosco Victorias sa dili pa moanhi sa Sugbo. Matod pa, suroyon niini ang tanang mga Don Bosco houses sa Sugbo ug moestar sab og kadiyot sa Cebu Metropolitan Cathedral ug sa Punta Princesa Parish Church.

Giingon niini ang rota kay di na man lang mga kanhi tinun-an sa Don Bosco schools ang nakaila ni St. John Bosco. Nasayran nga duna na sab siyay nagkadaghan nga mga deboto nga di mga past pupils sa mga tunghaan nga Salesian.

Sa miaging buwan, gipresentar ni Fr. Fidel Orendain SDB ang plano diha sa general meeting sa bag-ong gitukod nga Cebu chapter sa Bosconian International Chamber of Commerce (BICC).

Sa sunod general meeting karong Oktubre 6, 2010, anha sa Cebu Grand Hotel, makakuha na sab kita og mga update kabahin niini. Sa maong tigum, hisgutan sab ang mga final preparation sa umaabot nga chartering ceremony ug induction sa BICC Cebu nga gitakda karong Oktubre 16, 2010.

Sa pagkakaron, si Cebu Customs District Collector Ronnie Silvestre, nga usa ka past national federation president, tua sa Roma, Italy alang sa kalibotanong assembliya sa mga Don Bosco alumni kuyog sa duha pa ka mga Bosconian nga Pinoy gikan sa kaulohan.

IMPERIAL

Nibelib na ko ni Mayor Paz Radaza sa Syudad sa Lapu-Lapu dihang iya dayong gimando nga pasirad-an ang Imperial Hotel human nasakpan kining naglabay sa ilang hugaw diha sa dagat.

Bag-o pa man gud nga nihatag og pabor ang Imperial diha sa pag-host sa mga sakop sa media gikan sa Sugbo, Davao, ug Manila aron iduso ang proyekto sa mayor nga “Island Experience.”

Apan dihang nakalapas sa mga balaod ang hotel kabahin sa kinaiyahan, dali dayon kining nakaaksyon.

NAGA

Hapit na magsaulog ang Syudad sa Naga sa ilang tinuig nga pista apan klarong naguol si Mayor Val Chiong dihang niagi ko sa city hall sa miaging semana.

Unsaon, nibalik na sab sila sa pagka munisipyo basi sa labing ulahi nga desisyon sa Korte Suprema. Naninguha na sab si Mayor Chiong nga mausab ang maong desisyon.

Makahimuot ug makalagot. Makahimuot kay moguwa na karon nga walay klarong finality ang mga kaso nga moabot sa Korte Suprema. Magsigi na lang kini sa pag-usab-usab sa ilang mga desisyon.