NAGKASUMPAKI ug naka-engkuwentro ang baruganan sa estado ug sa Simbahang Katoliko kabahin niining kontrobersiyal nga Reproductive Health Bill nga naka-pending karon sa Kongreso. Gusto sa simbahan nga babagan kining  maong balaodnon gumikan kay nag-promote kini sa abortion. Pero ang maong balaodnon, naghingusog lang sa kampaniya sa kagamhanan kabahin sa Family Planning pinaagi sa artificial method.

Ang estado ug ang simbahan nagkahi-usa sa family planning. Walay kuwestiyon niana.

Apan nagkasumpaki lang sa pamaagi nga ipasagop sa magti-ayon. Ang gobiyerno pinaagi sa artificial method kay mao gayod kini ang epektibo nga pamaagi sa birth control.

Samtang ang simbahan gusto sa natural method kanang dili mogamit ug contraceptives.

Kay lagi kining contraceptives susama kini ug abortion kay magpatay man sa binhi.

Prevention, sa iningles pa. Apan ang simbahan nagkanayon usab nga dili kini prevention

kon dili abortion.

PROTESTA

Apil ning maong balaodnon mao ang pagtudlo sa sex education sa mga kabataan, butang usab nga gisupak gihapon sa taga simbahan. Gumikan kay hugot man ang baruganan ni Presidente Noynoy Aquino sa pagsuporta ning maong balaodnon sukad pa sa panahon sa kampaniya, mibahad ang taga simbahan nga molusad og mga sunod-sunod nga lihok protesta. Gani ilang nahuna-huna-an ang civil disobedience.

Naghisgot na sila nga ilang i-excommunicate si P-Noy. Aw, hinoon, kining bahad sa simbahan “let’s see the scattered” pa ni (makitang katag), matod pa ni Manny Pacquiao.

Kana kon makadala sila og mga tawo nga mosuporta sa ilang kawsa. Apan dili usab kini

angayan lang isalindot ni P-Noy kay ang simbahan dali kaayong tuhuan sa katawhan. Tan-awa unsay nahitabo sa Edsa 1 ug 2, midugok ang katawhan sa Edsa gumikan sa panawagan sa taga simbahan.

KAGAWASAN

Kon akoy pabut-on, atong hatagan ang usa ka magti-ayon ug kagawasan kon unsa ang matang sa family planning ang ilang pili-on. Kon ganahan ang magti-ayon kay nasubay sa lagda sa simbahan, okey. Kon gusto sila artificial kay mas epektibo, okey lang higapon. Lisod na kining mabahin-bahin pa ang atong nasud. Daghan kaayo kita ug problema nga gi-atubang unya masamok lang gumikan managlahi nga baruganan sa birth control? Mao na pait kaayo.

(bgnalzaro@gmanetwork.com)