Tambagi ko Noy Kulas: May 3 ka anak

DEAR Noy Kulas,

Tawga lang ko og Cheche, 22, single.

Naa koy boyfriend. He is 28. One year na mi kapin apan lately lang gyod nako na-confirm nga naa siyay three kids, pero wala sila nakasal sa mama sa mga bata and then buwag na sad sila before pa mi nagkaila. And then ang mga bata tua sa mama.

Maglisod ko pagdawat sa sitwasyon nga para nako complicated gihapon. Pero wala ko magpaila sa akong parents kay suod na kaayo sila. Di ko gusto nga maguba ang ilang maayong pagtagad sa usag-usa. Akong parents kahibaw sad sa iyang sitwasyon before nga nagkabuwag sila sa iyang live-in partner kay dili sila magkasinabot. Gubot ang ilang pagpuyo.

Para sa akong parents, okay ra at least di siya kasado. Pero sa part nako, naglisod kog dawat sa tinuod. Sakit ug bug-at kaayo. Sakit para nako nga wa siya nitug-an sa tinuod sa una pa. What should I do, Noy? Naghisgot na siya og kasal unya okay na sad akong parents. Please tambagi ko, Noy.

CHECHE

Che,

Maayong adlaw kanimo. Namakak diay siya sa tinud-anay niyang estado sa kinabuhi dihang bag-o pa mong nagkaila? At least di pa uwahi ang tanan dihang nasayod ka kay kon diha na ka nasayod sud sa inyong kaminyuon, haskang gubota kaha.

Maayo kay ning sayo pa nakahibawo ka ug matimbang mo ang tanan kon ipadayon mo ba ang inyong relasyon o di. Sakit gyud na kay wa man gud siya moladlad sa iyang baraha samtang nanguyab siya nimo. Wa masakiti ang imong parents kay di man sila ang nahitaboan, ikaw man.

Busa, ning higayuna di pa maayo nga hisgutan ang kasal, labina karon nga di ka pa gyud makadawat sa iyang sitwasyon. Ang labing importante karon mao ang pagtimbangtimbang kon makaayo ba ninyong duha ang pagpadayon sa relasyon kay mahimo man kining tunukon nga isyu ug motumaw sa matag karon ug unya kon magkaaway mong duha.

Pangayo unag break gikan niya aron mahinuktokan mo ang sitwasyon karon. Ikaduha, ingna siya nga di una mo maghisgot og kasal. Anyway, you are still so young. Enjoy your single life ug kab-ota una ang gusto mong kab-uton sa imong kinabuhi. Ilha una siya og maayo ug sutaa una kon nganong nakatulo sila sa iyang live-in unya failed ang ilang relasyon. Basin, masugamak mo sa samang kasaypanan tungod kay nagdali.Hinayhinay lang mo.

Kon okay ra niya, ilha ang iyang unang pamilya. Kaya nimo? Mosugot kag sa di, duna siyay responsibilidad sa iyang tulo ka mga anak. Di mo sila mahikawan kay ubos sa balaod, iya kining responsibilidad isip amahan. Mahimo man gani siyang makiha ug mapriso kon di niya ihatag ang ilang panginahanglan.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph