MANANAGAT nga nagmangtas sa kalagot, nitagodtagod patay sa iyang higalang mananagat tungod sa ilang panag-away kagahapon sa kaadlawon samtang sila nag-inom didto sa Sitio Dungo-an, Brgy. Kawayan, lungsod sa Dalaguete, Sugbo.

Hapit mangaputol ang ubang bahin sa lawas sa biktima nga gitigbas sa suspek.

Hapit maputol ang ulo, tiil, kamot ug ubang parte sa lawas ni Elino Quilaton, 25, ulitawo, mananagat, human gitigbas sa silingan nga si Mark Joseph Carin, 23, ulitawo, kinsa bulontaryong ni-surrender human sa krimin.

Sa report ni SPO2 Cleto Pia, imbestigador sa kapulisan sa lungsod sa Dalaguete

police station, nga nag-inom ang biktima ug suspek sa wa pa mahitabo ang krimen.

Giingong nasuko ang suspek sa biktima dihang sila nangahabog ug nagkalalis.

Kalit lang siyang gikwelyuhan hinungdan nga nikuha siya og sundang ug gitigbas ang biktima makadaghang higayon sa nagkadaiyang parte sa lawas.

Dugang nakuhang impormasyon sa kapulisan nga ang biktima giingong pwerting hilumuna kon di makainom apan kon mahubog, magmaoy usab kini.

Si Carin unang ni-surrender sa ilang brgy. kapitan apan pag-abot sa mga pulis niresponde gi-turnover kini ug gitanggong samtang giandam ang tukmang kasong ipasaka batok niini.

Samtang ang biktima naatban na lang sa kapulisan nga nagbuy-ob na diha sa yuta nga naligo sa kaugalingong dugo.