GIANGKON ni Department of Interior and Local Government (DILG) Secretary Jesse Robredo nga kuwang sa kahimanan ang kabomberohan sa nasud, human nga nihangyo ang dakbayan sa Sugbo og dugang firetrucks.
Naatol nga adunay sunog nga niulbo sa barangay Sambag 1 kagahapon nga mao usab ang pagduaw ni Robredo aron sa pagsaulog sa 2010 World Habitat Day ug nakahigayon sa paghangyo si Mayor Michael Rama og dugang fire trucks.
Matod pa ni Robredo nga sa 600 ka local government units sa tibuok nasud adunay mga kakuwangan sa matag fire stations ilabi na sa firetrucks.
Iyang gibutyag nga nakig-alayon na sila sa mga foreign donor nga makahatag og donasyon ilabi na sa mga kahimanan sa kabomberohan.
“We still need to make assessment sa Cebu City Fire Department. Hopefully, we will be able to help Mike (Rama),” dason sa kalihim.
Nisaad si Robredo nga sunod tuig makasugod na sila og pamalit sa ma- ong mga kahimanan ilabi na magmatngon ang administrasyon ni Presidente Benigno Aquino III sa paggamit sa nasudnong pundo.
Mapasalamaton ang opisyal sa abag sa Chinese Volunteer Fire Brigade nga di magmakuli sa pagtubag sa higayon nga adunay alarma sa sunog.