PATAY ang usa ka habal-habal driver nga gipusil sa mga karnaper nga mipakyaw kaniya alas dos sa hapon niadtong Lunes didto sa probinsiya sa Cotabato.

Apan usa sa mga karnaper namatay sab sa dihang nakigpinusilay kini sa mga otoridad nga milutos ug nakaapas nila didto sa Barangay Ulamian, Libungan Cotabato.

Si Cotabato Police Provincial Director Cornelio Salinas mi-ila sa habal-habal driver nga si Jessie Apolinario, 29, minyo ug molupyo sa Barangay Bulukaon, Pigcawayan.

Ang patay nga karnaper mao si Rasul Naute ug ang nadakpan nyang mga kauban mao sila si Angkong Rakman, 25, ug Abdulnasser Amil, 18, pulos nagpuyo sa Pagalungan, Maguindanao.

Subay sa taho gikan sa Cotabato Police Provincial Office, nasayran nga gipakyaw sa mga suspek ang biktima gikan sa Barangay Poblacion, Pigkawayan, ug nagpahatud sila sa Barangay Buricain. Apan bisan wala pa sila mahiabot sa maong lugar, gipusil na sa usa sa mga suspek ang drayber gamit ang kalibre .45 nga pistola.

Hingkabsan gilayon sa kinabuhi si Apolinario kinsa naigo sa iyang tangkugo ug ang bala milapos sa iyang nawong.

Dali nga miiskapo ang mga karnaper dala ang Yamaha STX 125 nga motorsiklo sa biktima. Apan dunay mga sibilyan nga nakakita sa hitabo nga maoy mitaho ngadto sa mga otoridad, ang grupo ni Pigkawayan Police Chief Inspector Abello Jungaya, kinsa miresponde gilayon ug gilutos ang mga suspek.

Gibutyag ni Jungaya nga ang mga suspek usa ka organisadong grupo nga nalambigit sa sunod-sunod nga pagpangarnap sa mga motorsiklo sa siyudad sa Cotabato, Maguindanao ug North Cotabato. (Edgardo Fuerzas)