ANG Davao City Police Office (DCPO) naalarma sa sunod-sunod nga pagpamusil patay, hinungdan nga gimandoan karon ang tanang station commanders nga doblehon ang paningkamot aron masulbad ang mga krimen nga nahitabo dinhi sa siyudad sa Davao.
"Well, tinuod nga daghan na ang mga shooting incidents nga nahitabo. Therefore, we are urging the station commanders to double their efforts to investigate the case," matud ni DCPO Investigation Detection and Management Branch chief Police Superintendent Antonio Rivera kagahapon sa Sun.Star SuperBalita.
Si Rivera nagsulti nga ang uban sa mga gipamatay dinhi sa siyudad dunay mga rekord sa kapulisan.
"Accordingly, based on investigations some of them have police records. They are involved in illegal activities," pahayag ni Rivera.
Ang maong opisyal nagbutyag nga ilang gimandoan ang tanang hepe sa kapulisan nga maningkamot nga mailhan ug masikop ang mga suspetsado sa pagpamusil patay.
"We ordered them to really solve the problem," pahayag ni Rivera kinsa midugang nga naghangyo na sila sa Philippine National Police Crime Laboratory alang sa "cross matching" sa mga basiyo sa bala sa armas nga gigamit sa mga mamumuno.
Himuon sa otoridad ang "cross matching" sa mga basiyo sa bala sa armas nga gigamit sa krimen aron masayran kung usa lang ka grupo ang mihimo sa sunod-sunod nga pagpamatay dinhi sa dakbayan.
"Wala may Davao Death Squad (DDS) so walay kamatuoran ang ilang gisulti nga mibalik na ang DDS. Ang nahitabo dinhi are mere shooting incidents," ingon ni Rivera dihang gipangutana kung duna bay posibilidad nga mibalik na ang vigilanteng pundok nga mao ang DDS.
Ang maong opisyal naghangyo sab sa katawhan nga motabang sa kapulisan pinaagi sa paghatag og impormasyon bahin sa ilang nasayran sa mga krimen nga nagapanghitabo dinhi sa dakbayan. (Alger Dura)