USA ka 14 anyos ang gilugos sa kaugalingong amahan makapila ka higayon sa Poblacion, lungsod sa Tagoloan, Misamis Oriental.
Giila ang biktima nga mao si Rina (tinuod nga ngalan gipugngan), sa susamang dapit.
Gitumbok nga suspetsado ang kaugalingon nga amahan nga mao si Romeo Pading, 38, bulag sa asawa.
Si PO2 Guillermo Casiño sa Tagoloan Police Station nibutyag nga makaduha ka higayon nga nagpatabang sa ilang buhatan ang biktima kuyog ang ayaan niini niadtong nilabay'ng bulan.
Gisaysay sa ayaan nga nitug-an kaniya si Rina halos matag-adlaw hilabtan siya sa iyang amahan. Giingong hulgaon siya niini hinungdan nga nahadlok siyang motug-an.
Nagtungha sa Tagoloan Central School ang biktima ug namatikdan ang kanunay kining maghinuktok.
Ang ulahing pagpanglugos nahitabo niadtong niaging adlaw hinungdan nga nagpatabang na usab sa kapolisan ang biktima ug nisaysay sa nahitabo kaniya.
Gibutyag sa biktima nga kaupat sa usa ka adlaw siya hilabtan sa iyang amahan. Gihimo ang medical check-up niini ug gikostudya ang biktima sa Department of Social Welfare and Development ning panahona.
Matud ni Casiño nga wala masikop ang suspetsado tungod kay nakasibat na kini
ning panahona ug wala na sa puloy-anan. Nitumaw usab ang taho nga mabdos ang biktima ning panahona apan padayon pang gisuta sa kapolisan. (SVB)