MINNESOTA - PINOY boxer nga kanhi baker sa Cebu City ug kanhi U.S. belt champion Ceferino “Cepriano” (Pedro) Garcia a.k.a. bolo punch nalakip karon sa mga kandidato alang sa International Boxing Hall of Fame.
Si Garcia, 5’7, natawo niadtong Agosto 26, 1906 sa Naval Biliran ug namatay niadtong Enero 1, 1981 sa edad nga 74. Aduna siya’y rekord nga 102-28-12, 67KOs.
Kauban ni Garcia sa listahan sa mga kandidato mao sila si kanhi undisputed heavyweight champion Mike “Iron” Tyson, all time-great Mexican boxing legend Julio Cesar Chavez Sr. ug kanhi undisputed light welterweight champion Kostya Tszyu sa Russia.
Naila kaniadto si Garcia sa grabeng pagkasugarol hinungdan nga wala makatiwas sa grade one. Nagtrabaho isip tigpanday’g sundang, mibalhin sa pagluto og pan sa usa sa mga bakery sa dakbayan sa Sugbo.
Hangtod niabot ang higayon nga aduna siya’y gikailang boxing promoter nga mao nay nag-agak kaniya sa kalibutan sa boksing.
Sa iyang pagpanimpalad sa gawas sa nasod iyang naangkon niya ang USA California State welterweight title samtang iya usab nga naangkon ang New York State Athletic Commission (NYSAC) title bali’g tag pito ka tuig.
Lakip sa mga sikat nga iyang gikaharong mao sila si Henry Armstrong, Fred Apostoli, Anton Christoforidis, Young Corbett III, Lloyd Marshall, Ken Overlin, Barney Ross, Billy Soose, ug Freddie Steele.
Ang Boxing Writers Association of America (BWAA) nagsugod na pagpanawat og mga balota kagahapon diin ang mga kandidato nga gipangdawat mao kadtong miretiro na lima ka mga tuig ang nakalabay.
Ang resulta sa maong pagpili ipagawas sa Disyembre 7 samtang ang pasidungog ipahigayon karong sa Hunyo 12 sunod tuig atol sa annual induction ceremony nga ipahigayon sa Canastota, New York. (Daniel Quindao Guden-US Correspondent)