WAY lalis kon daghan kag anak magkalisud ang imong pagpuyo bisan pa man gani ug pulos nagtrabaho ang inahan ug amahan. Ilabi na gayud karong panahuna nga mahal na ang tanan. Bayad sa eskuwelahan, pagkaon tambal ug uban pa.
Tan-awa daghan ang nangaupaw kay stress sa ilang panginabuhi (way labot niadtong dunay kaliwat ug upaw ha). Ang uban mokaon nalang ug kaduha sud sa usa ka adlaw tungod sa pagbudget sa kuwarta aron makaabot sa adlaw sa pagsuweldo.
Samot na niadtong daghag mga anak.Tan-awa ang ubang ginikanan gipahunong ang tulo sa
Lima ka mga anak ug ang duha lang una ang nagpadayon sa pagtungha kay nagtakilid ang ilang kahimtang. Wa pa gani nato hisguti ang kahimtang sa magtiayon nga namugaw ang bana sa iyang asawa aron lang makakuwarta.
Laktod pagkasulti, dako kaayo kong pabor sa Reproductive Health Bill. Kini mas naila kaniadto nga family planning program. Ang maong balaod naglantaw alang sa maayong ugma ug pagpugong sa paspas nga pagtubo sa populasyon nga maoy nakaingon sa atong kalisud.
Mao nay giingon nga mahimong way pulos ang kapaspas sa ekonomiya sa Pilipinas kay maglisud man gihapon ang kahimtang sa pagpuyo sa usa ka pamilya tungod sa kadaghan ug mga anak. Mao nay ilang giingon di man tingale dautan kun dunay maayong plano sa pamilya sama sa pagkontrol sa gidaghanon sa ilang mga anak.
Kamo kumusta mo diha nga nagbaton ug daghang mga anak? Di ba lisud ang inyong pagpuyo ug nagmahay kay nganong gipun-an? Lisud naman gani sa pagbuhi ug mga mananap kay minos na ang mga tanom. Ang tawo pa ba kaha nga mas daghan ug gikinahanglan.
NAGHUBO SA INTERNET
Naghilak kay hapit mabiktima sa pangpanglugos. Apan wa mohilak sa kauwaw nga nagpakita sa iyang lawas sa iyang ka Facebook sa Internet. Mao ni resulta niadtong mga babaye nga dunay personal nga mga interes tungod sa ilang tinguha nga mahatag ang panginahanglan.
Gireklamo man gud sa usa ka babaye ang lalake nga iyang ka facebook nga misuway og lugos kaniya human nanghulga nga ipakatap sa Facebook ang hubo niining mga hulagway kun di makigtigi sa kalipay.
Kini nakapahinumdom nako sa estorya sa akong amigo. Kasinatian sab kini sa iyang suod nga higala. Kay ignorante man lagi niining bag-ong teknolohiya sama sa pag-chat ginamit ang webcam. Makauuwaw ang iyang kasinatian kay nabiktima siya sa usa ka bayot.
Tiaw moy naglaway siyang nagtan-aw sa bungtod sa dughan ug sa kaguwapa sa iyang ka chat nga gituhoan niyang usa ka babaye. Pila may estorya nagkahimamat sa personal ang duha ug unya wa makapugong ang lalake ug girubo ang babaye nga nanagang nga di mapanamastamasan.
Sus, paita sa iyang gidangatan. Nalupig man tuod niya sa kusog ug hapit gyud makuha ang pagkababaye. Ang nahitabo puwerteng suka sa lalake kay ang nagpatuong babaye nga iyang gikaromansa ug nagdumili nga magpagerger, usa man diay ka bayot kay nagunitan ni lalake ang ikog sa bayot sa pagkuot niini sa ilawom sa underwear.
Mao ni resulta niadtong magpailad pinaagi sa facebook, chat ug wedcam. Maayo ra sab nga wa gyud ko mosakay aning bag-ong uso. Mogamit lang ko sa laptop alang sa mga research, report ug motan-aw ug video.
Hinoon mas maayo man sab nga mahibawo ta aning tanan apan di lang magpailad ug gamiton sa mga binoang ang nahibaw-an sa internet. Ang kahakog sa kuwarta ug sa lawasnong panginahanglan di gyud diay maayo.
Himoa ni ninyong ehemplo ang nahitabo sa duha ka mga biktima o namiktima. Ang resulta silay mga biktima sa ilang kaboang ug maoy nauuwawan.
NADUTLAN
Makatilaw na gayud sa pagkabilanggo ang kanhi abusadong mayor sa lungsod sa Sta Fe lalawigan sa Sugbo, Roger Illustrisimo. Kini human nakapagawas ug final nga hukom ang korte suprema sa kaso niining serious physical injuries.
Kini wa pay labot sa kasong pagpatay. Nakadawat kog report sa kaabusado aning tawahana. Sa gihimo niining Roger, tulo gyud ka ngipon ni Catalino Veliganilao ang natangtang kay gihapak ug pistol.
(efren_lonzon@yahoo.com Text:09084171222)