GIANTOS sa mga taga Brgy. Sambag 1 ang ilang kalisod human sila maigo sa dakong sunog sa miaging adlaw.

Matod sa pipila ka mga lumolupyo nga wa na silay mahimo pa kon di ang pagdawat sa kamatuoran kay nahitabo na man gyud ang sunog.

Si Estrella Sala, sakop sa usa sa 192 ka mga pamilyang naapektuhan sa maong kalamidad, niingon nga lisod alang kanila nga magsugod og usab gumikan kay wa man silay kwarta.

Di sama niadtong uban nga nasunogan nga dunay ikasarang sa pagtukod og balik sa ilang balay, matod niya.

Nagpasalamat na lang sila nga wa pasagdi sa ilang kapitan nga si Jerry Guardo nga nag-atiman sa ilang mga panginahanglan.

Lakip sa ilang gipasalamat nga way naangol o nakalas kanila sa pag-igo sa sunog.

Si Guardo niingon nga magamit sa ilang barangay ang ilang calamity fund sa pag-abag sa apektadong mga lumolupyo.

Ang mga nasunogan sa mga Sityo Atis ug Upper Kawayan naa gibutang sa sports complex sa barangay ug sa usa ka bakanteng bilyaran.

Samtang kadtong wa na masulod sa complex anaa lang sa daplin sa dan nagpahimutang, dala ang ilang mga butang.

Dunay gibutang nga portable toilets ug ilang makaligoan ingon man makuhaan og tubig nga mainom.

Nag-apod-apod usab ang Siyudad og mga pagkaon ug uban pang panginahanglan sa apektadong mga residente.

Samtang sa Southwestern University (SWU), mga tinun-an ningtabang sa paglimpyo sa edipisyo sa tunghaan nga nasunog.

“ Amo jud ning dalion paglimpyo lakip na ning among department (maritime department) para next week puhon mobalik na mig klase aning building. Kon dili gani madali, basin sunod semester na ni magamit og balik,” matod sa usa ka tinun-an.

Bisan kon dunay apek-tadong mga tinun-an, ang tunghaan nagbutang og donation box alang sa mga lumolupyong apektado. Lilibeth Sanico-PIT AB Comm Intern/Leo Neil V. Pintor-USJR Masscom Intern