USA ka progresibong grupo nagduda nga gibayran lang si Melchor Fulgencio, 52, biyudo, kanhing sakop sa Citizen Armed Force Geographical Unit ug molupyo sa Barangay Timanan, South Upi, Maguindanao, aron angkunon ang paglugos sa 21 anyos nga staff nurse sa South Upi Municipal Hospital.

Matud sa Gabriela-Cotabato nga tumong niini nga tabunan ang tinuod nga mga suspek nga gitumbok nga gikan sa mga empluwensiyadong pamilya sa mga inilang politiko.

Kahinumduman nga misurender si Fulgencio sa Criminal Investigation and Detection Group (CIDG) sa Autonomous Region in Muslim Mindanao ug iyang gi-angkon nga siya ang milugos sa biktima uban ang usa ka alyas Edwin nga padayon karong gipangita sa mga otoridad.

Gidugang ni Fulgencio nga hubog siya niadtong orasa sa diha nga ilang giatngan ang dalaga, gibunalan og kahoy ang nawong ug ulo, og pagkahuman gipanamas-tamasan ang iyang kahuyang.

Siya misurender sa kapulisan gumikan kay nakonsensiya sa iyang gihimo ug halos matag gabii dili siya makatulog gumikan sa sitwasyon sa biktima sulod sa balay tambalanan.

Gipanghimakak sab ni South Upi Vice Mayor Jordan Ibrahim Campong ang akusasyon nga siya ang utok sa krimen. Matud niya nga usa kini ka dakong bakak ug way kamatuoran ug pagpangdaut lang ngadto kaniya.

Hinuon, mas gipalig-on karon sa Task Force Joy nga gilangkuban sa CIDG, National Bureau of Investigation ug Philippine National Police sa Maguindanao police ang gihimong imbestigasyon sa hitabo. (Edgardo Fuerzas)