USA na sab ka lalaki nasikop tungod sa paghupot og hinagiban luyo sa gipatuman nga Commission on Elections (Comelec) gun ban sa mga otoridad didto sa Barangay Poblacion, lungsod sa Compostela, Comval Province, Martes sa kaadlawon.

Nailhan ang dinakpan nga mao si Marlon Barinan, 22, molupyo sa Purok 14, Barangay Lower Ulip, lungsod sa Monkayo, Comval.

Sa report gikan sa Comval Province Police Provincial Office, nasayran nga pasado alas 12:30 sa kaadlawon gisikop sa grupo nila PO3 Allen Camillo ang suspek didto sa maong lugar kay nasakpang nagdala-dala og kutsilyo.

Sa imbestigasyon sa kapulisan, nasayran nga usa ka sumbong ang nadawat sa mga sakop sa Compostela Municipal Police Station human nanghasi gamit ang kutsilyo ang grupo sa suspek didto sa Purok 2, dalang Dagohoy, sa susamang dapit.

Gilayong miresponde ang kapulisan ug ilang nasikop ang suspek apan ang mga kauban niya abtik nga nakasibat padulong sa wa matino nga lugar. Nasakmit sa mga otoridad gikan sa mga dinakpan ang usa ka batangas nga kutsilyo, duha ka bato ug papel nga alcoy.

Ang dinakpan gitanggong dayon sulod sa selda samtang giimbestigahan pa siya sa kapulisan. Kasong concealment of deadly weapon in relation to Comelec gun ban ang gihikay nga kaso sa kapulisan batok sa dinakpan. (Marvin Pineda)