KUWARTA ug tseke balor og P80 mil ang nahanaw gikan sa usa ka empleyado sa gobyerno human gikuot didto sa terminal sa siyudad sa Panabo, Martes sa buntag.
Ang biktima mao si Judy Cervantes, 29, molupyo sa Meycauayan, Bulacan.
Sa report gikan sa Panabo City Police Station, nasayran nga pasado alas 8:00 sa buntag samtang didto sa maong dapit ang biktima, iya na lamang nasayran nga ang iyang pitaka nga dunay sulod nga kuwarta balor og P30 mil ug tseke balor P50 mil ug mga importanting dokumento nahanaw na ug gituohang gikuot sa wa mailhing suspek.
Way nahimo ang biktima mao nga midangop dayon sa buhatan sa Panabo police station. Ang kapulisan mihimo na og dugang imbestigasyon sa maong hitabo.
Sa laing bahin, usa ka pampasaherong sakyanan nga gituohang gikarnap narekober sa kapulisan didto sa Purok 4, Barangay La Filipina, siyudad sa Tagum, Martes sa buntag.
Sumala sa report, pasado alas 7:00 sa buntag usa ka Isuzo Jitney nga nagbaton sa plaka numero LWP-611 ug nagbiyahe sa rotang Panabo-Davao, ang giabanduna sa wa mailhing mga suspetsado og narekober sa mga otoridad didto sa maong lugar.
Ang maong sakyanan matud pa gipanag-iya sa usa ka Flordelin Kawang.
Alas 3:00 sa kaadlawon niadtong Sabado gituohang gikarnap sa usa ka alyas Junjun ang maong sakyanan didto sa siyudad sa Panabo.
Ang sakyanan gikostudiya na karon sa mga otoridad samtang gisusi pa ang hitabo. (Marvin Pineda)