LAWOM nga imbestigasyon ang gihimo sa mga imbestigador sa kapulisan aron masayran kung kinsa ang mga suspetsado sa sunod-sunod nga pagpamusil patay dinhi sa dakbayan sa Davao.

Mga station commanders gimandoan Davao City Police Office (DCPO) nga palawman ang ilang imbestigasyon aron masulbad ang mga pagpamusil patay sud sa ilang area og responsibility, sigun ni DCPO spokesperson Police Superintendent Antonio Rivera sa Sun.Star SuperBalita.

Si Rivera miangkon nga nahimong suliran nila karon ang mga pagpamusil patay dinhi sa siyudad mao nga nangayo sab sila og tabang sa katawhan nga nakasaksi sa pagpamusil.

"Well, tinuod nga daghan na ang mga shooting incidents nga nahitabo. Therefore, we are urging the station commanders to double their effort to investigate the case," pahayag ni Rivera.

Si Rivera nagsulti nga ang uban sa mga gipamatay dinhi sa siyudad dunay mga rekord sa kapulisan.

"Accordingly, based on investigations, some of them have police records. They are involved in illegal activities," pahayag ni Rivera.

Giingon nga sukad niadtong buwan sa Hulyo hangtud karon, dunay 32 ka mga tawo nga gipamusil dinhi sa siyudad.

Mga mamumuno, sigun sa imbestigasyon sa kapulisan, managsama og paagi, armas ug motorsiklo ang ilang gigamit sa pagpatay sa ilang target.

Ang labing uwahing biktima sa mga mamumuno mao ang usa ka dispatser sa mga "payong-payong" didto sa Barangay Bucana niadtong Lunes.

Ang biktima mao si Sheldon Flores, alyas Dondon, 28, ulitawo ug nagpuyo sa Purok 11, Sto. Niño, Barangay Bucana, ning siyudad.

Si FLores nagtindog lamang duol sa ilang balay sa alas 7:00 sa gabii apan kalit miabot ang usa ka tawo ug way daghang pangutana gipusil siya sa makadaghan nga higayon.

Si Flores nakadagan pa paingon sa Purok 13 apan gigukod siya sa mamumuno ug didto siya gitiwasan pagpusil hangtud nga namatay, sigun sa mga Scene of the Crime Operatives.

Human sa maong hitabo, suma sa mga nakasaksi, ang mamumuno daling mibiya sa crime scene ug misakay sa usa ka motorsiklo nga gimaneho sa laing tawo.

Tungod sa maong mga hitabo, miguwa ang katahap nga basin mibalik na ang mga vigilanteng pundok nga mao ang Davao Death Squad (DDS) apan ang kapulisan nagbutyag nga way kamatuoran ang maong katahap.

"Wala may DDS so walay kamatuoran ang ilang gisulti nga mibalik na ang DDS. Ang nahitabo dinhi are mere shooting incidents," pangatarungan ni Rivera. (AD)