NAGTAMBAYAYONG ang ALA Promotions ug television giant ABS-CBN alang sa usa ka taas nga ambisyon – ang paghimo sa Cebu City nga "Las Vegas" sa Pilipinas sa kalibutan sa boksing.

“If United States has Las Vegas, we wanted Cebu to be the Las Vegas in our country,” matod ni ALA Promotions president Michael Aldeguer kagahapon sa usa ka press conference sa Sports Exchange Bar sa Mango Ave. ning dakbayan.

Ning maong ambisyon, ang ALA Promotions ug ABS-CBN mopasiugda sa “Pinoy Pride,” nga magdalit og sunodsunod nga dagkong promosyon sa boksing dinhi sa Sugbo.

Ning maong plano, nanghinaot ang ALA Promotions ug ABS-CBN nga mahimong sentro sa boksing sa nasod ang Sugbo sama sa Las Vegas, nga mao gyu’y han-ukan sa dagkong boxing promotions sa Amerika.

“We can do it in our own country particularly in Cebu,” dugang ni Aldeguer.

Unang mobuto ang Pinoy Pride karong Oktubre 30 sa Waterfront Hotel diin mopakita’g aksyon sa main event si AJ “Bazooka” Banal batok sa usa ka dekalidad nga kontra.

Si Banal (21-1-1, 17KOs), kinsa usa sa dekalidad mga boksidor sa Pilipinas, makigharong sa kanhi two-time world champion Luis Albertro Perez (26-4, 17KOs) sa Nicaragua.

Nagkanayon si Aldeguer nga kining awaya mao gyu’y sukdanan kon angayan na ba gyud si Banal nga manuktok alang sa world title sa umaabot nga mga adlaw.

“Looking at him (Banal) in the gym, we can say nga naa na ang iyang mental maturity and his emotional maturity,” matod ni Aldeguer.

Apan giklaro ni Aldeguer nga dili gyud kini nila mapamatud-an kon dili nila iparang si Banal og world caliber boxer sama ni Perez.

Alang kang Banal, hingpit na gyud siyang naka-recover gikan sa masakit nga una niyang kapildihan (TKO 10) batok kang Colombian Rafael Concepcion niadtong 2008 sa Cebu Coliseum.

Gipaasabot sa 21 anyos nga boksidor gikan sa Brgy. Ermita, Cebu City nga andam na gyud kaayo siya alang sa dagkong mga away sa emosyonal ug pisikal nga aspeto.

“Andam na kaayo ko aning duwaa. One hundred percent nga andam na gyud ko. Ako pang palabwan, 101 percent,” batbat ni Banal.

Apan nagkanayon nga ang trainer ni Banal nga si Edmund Villamor nga ning puntoha, naa pa sa 80 percent si Banal apan malaumon siya nga inig abot sa gikatakdang petsa, hayan hingpit na gyung maandam si Banal.

Mopakita’g aksyon sa undercard sa Banal-Perez bout mao sila si Mark Jason Melligen, Jason Pagara ug Larry Canillas, kinsa makigharong og tagsatagsa ka dekalidad nga kontra.

Human sa Banal-Perez, ang Pinoy Pride mopasiugda na sab og laing dakong promosyon karong Nobiyembre 27 diin magharong sila si Milan Milendo ug Carlos Tamara sa Waterfront Hotel gihapon.

Unya sundan na sab kini sa panagharong og balik nila ni Rey “Boom-Boom” Bautista ug Mexican Alejandro Barrera karong Enero 20 sa samang venue.