SA tinguha nga masulbad ang problema sa kawad-on sa nasod, ang administrasyon ni Presidenti Benigno Noynoy Aquino ang migahin og P21 Bilyunes alang sa paghatag og direktang hinabang sa 2.3 Milyunes ka mga pinakapobreng pamilya aron ning maong pamaagi, hingpit da unyang mabugto ang talikala nga naggaid kanila sa kalisdanan sulod sa pipila na ka mga henerasyon.
Kining maong pamaagi, kabahin ug tipik sa programang “Pantawid Pamilyang Pilipino Program” nga adunay kinatibuk-ang gahin nga P29 Bilyunes nga anaa gihurot sa pag-imbudo sa buhatan sa Department of Social Welfare and Development ni Dinky Soliman.
Kining maong 4P’s Program nasugdan na sa pagpatuman sa panahon ni kanhi Presidente Gloria Macapagal Arroyo atol sa iyang pagpangatungdanan dili sa pagsulbad sa kawad-on kon dili aron mao kini magsilbeng deodorant sa nangalisbong baho sa mga anomaliya sa iyang pangobyerno.
Ning maong pamaagi, ilhon unya sa DSWD kon si kinsa ang mamahimong makadawat sa benepisyo diin dili usab unya kalikayan ang pag-ampahay ug mga pagmahay kay sa tinud-anay dili man gyud maapod sa paghatag sa gobyerno ang tanang mga naglakisod nga mga Pilipino lukop kapupud-an. Unya kadtong makadawat ang hatagan og tabang pinansyal matag buwan ubos sa kondisyon nga ang ilang mga anak kinahanglan gyud nga patunghaon kay og dili kini matuman, putlon man sa gobyerno ang gihatag nga sustento.
Samtang dalaygon ang tinguha ning maong Conditional Cash Trasnfer Program apan ang pangutana, nganong ipursige man ang pagpatuman sa solusyon nga daan na tang nasayod nga dili gyud mahitabong makasulbad sa atong problema? Ning kahimtang sa atong panudlanan, napugos ang atong kagamhanan sa pagkibhang sa pundo sa ubang mga importanteng mga serbisyo sama sa edukasyon, panglawas ug sa tabang legal sa atong mga OFW’s aron mauna lamang kining programa sa departamento ni Dinky Soliman.
Ang nakaporke pa gyud kay limitado da kaayo ang matabangan unya karon pa lang daan morag nanimaho na nga mawani na usab kitang mga taga Mindanao ug Kabisayaan kay unahon man sa pagseguro ang Metro Manila ug Luzon Area nga maoy sayon kaayong magamit sa populist nga propaganda nga kintahay mialibyo na ang kalisdanan sa atong katawhan.
Gawas pa, ang ilang gihatag nga pamaagi usa ka long term solution apan ang ilang pundo pang short term lamang ang kayang maabtan. Tingali kining maong pamaagi makapahumot ug makapasikat kang Noynoy ngadto sa kabus nga mg Pinoy apan kini susama da sa paghagwa sa atong kaugalingon nga kita naglipay ug nagmaya taliwa sa atong pabiling paglangoy sa lapok sa kalisdanan. Puslan mang ato ng gisungasong kining maong gubat batok sa kawad-on, mao nalang untay pangitaon ang tinud-anay nga solusyon og dili ang pasikat nga hagbay dang gihatag sa mga Pilipino diha sa iyang administrasyon.