KON wala pa mapili si Provincial Board Member Arleigh Sitoy dili unta ta makadungog ug mga wayuk (kuyaw) og talagsaon nga mga huna-huna ug sugyot balaodnon diha sa Hunta Probensiyal. “Out of this world”, matod pa ni Gobernor Gwen Garcia. Tinuod uy, kay unique gud nang iyang mga sugyot ni Bokal Sitoy.
Una, iyang patukuran og comfort rooms ang mga bayot ug tomboy. Ambot puwede ba kaha kini sa probinsiya nga ang mga establisamento didto, usa ra man gani ang pansayan.
Wala gani gyud ang uban. Ang mga tawo anha lang mangihi sa kilid-kilid sa merkado, terminal. Unya magtukod pa para sa mga bayot ug tomboy.
WARNING
Gumikan kay na-stroke man siya human mokaon og chicharon, gustong pabutangan ni Sitoy og warning ang matag pakete sa chicharon nga dili kini maka-ayo sa lawas gumikan sa tambok. Ang lechon, humba ug lansiaw nga tambok man sab na, dili butangan, kagawad?
Ipabalik ni Arleigh ang swimsuit competition sa mga beauty contest. Gusto siguro niya nga makita ang “bay sa kaka” sa mga contestant. Aduna na man guy provincial ordinance nga nagdili niini human mo-ulbo ang kaspa ni Gob. Garcia didto sa Boljoon dihang iyang nakita ang mga beauty contestant nga nagsul-ob og bikini. Sus, ug matangtang ang hikot sa kilid no? Alegre gyud.
Unya gusto pod ni Sitoy nga kadtong mga bana mopalit og sex enhancer o kanang tabletas para patindog ni ‘manoy’ gikinahanglan pang mangayo og permiso sa ilang mga asawa. Pastilan kinsa gong boanga nga mohimo niana? Ayo mabunalan og palo-palo. Maayo kon kanang tabletas gamiton sa bana “pagpakigbugno” sa iyang asawa. Unya og adto gamiton sa pag-esmiringhoy sa ubang babaye?
WA NAY MAHUNA-HUNAAN
Nagtuo si Arleigh nga wala gyod siyay mahimo diha sa Provincial Board kon mopasar o mopalabang siya og tinarong nga mga balaodnon kay nag-inusara ra man siya. Dili man gyod makalusot kanang iyang mga balaodnon kon dili ma-uyonan sa kadaghanan nga mga kaalyado ni Gwen. Mao nga mga werdo o wayuk lang nga mga isyo iyang gipalutaw. Basin siguro og nagkinahanglan si Arleigh og advise sa iyang amahan nga si Cordova Mayor Adi
Sitoy, kinsa usa ka banggi-itan nga abogado, aron matarong pod nang iyang huna-huna.
Kuyawan ko sunod basin mosugyot na pod si Arleigh nga dili na pasudlon ang mga bagyo sa Pilipinas. (bgnalzaro@gmanetwork.com)