SUGOD karong adlawa di na tawgon og Mayor’s Management Team (MMT) ang grupo sa mga graduate sa college nga cum laude, summa cum laude ug magna Cum laude nga kaabag sa administrasyon ni kanhi mayor ug karon kongresista sa south district Tomas R. Osmeña.

Ang kanhi MMT pagatawgon na og Research and Development Team (RDT) sa administrasyon ni Cebu City Mayor Michael L. Rama.

Gipatawag sa mayor ang tanang mga sakop sa MMT nga nagtrabaho sa Cebu City Hall sukad pa sa administrasyon ni Osmeña ug sa hamubo nga panagtigom didto gipahibawo ang ilang bag-ong ngalan.

Si City Administrator Atty. Jose Marie Poblete nga didto usab sa panagtigom nagkanayon nga ang ngalan ra sa MMT maoy giusab ug magpabilin silang mga kawani.

Ang opisina sa kanhi MMT ug karon RDT ilawom na sa Human Resource Department (HRD) ug di na sa Office of the Mayor sukwahi sa miaging administrasyon.

Si Poblete niingon nga ang mga MMT nilambo na og maayo karon hinungdan nga sa bag-ong administrasyon angay na usab nga pagailisan ang ngalan niini.

Giklaro niya nga ang ngalan ra sa MMT maoy nawala apan nagpabilin gihapon ang ilang gimbuhaton.

Iyang gipasabot nga kaniadto ang mga MMT adunay mga pagtuon nga gihimo sa nagkalainlaing aspeto nga nakatabang sa nakalabay nga administrasyon ug karon kini magpadayon.

Gidugang ni Poblete nga ang MMT mohimo gihapon og mga research diin sila kabisado.

Siya nidugang nga ang RDT usa ka multi-tasking team sanglit aduna usab silay nagkalain-laing trabahuon depende sa isugo sa ilang labaw.

Iyang giklaro nga way nangataktak sa kanhi mga alalay ni Osmeña.

Gani ang uban nahimo nang regular nga empleyado sa Cebu City Hall tungod sa ubang nabakante nga pwesto samtang ang uban nagpabilin lang gihapon nga casual. PAC