IPADAYON kagahapon ang paghusay sa kasong parricide nga giatubang ni PBMA Supreme Master Ruben Ecleo Jr. apan buot unta sa iyang abogado nga di kini mahinayon kay giingong gi-high blood kini.
Atol sa husay kagahapon, si Ecleo, nga karon napiling kongresista sa Dinagat, nipahibawo nga gipasanginlan siya sa iyang mga bayawng lalake nga maoy nipatay sa ilang igsuong babaye tungod sa kwarta ug politika
.
Wa motugot si Regional Trial Court (RTC) Judge Soliver Peras sa hangyo ni Atty. Orlando Salatandre, abogado ni Ecleo, busa nipadayon siya sa iyang direct examination sa iyang kliyente.
Si Peras nangutana kang Salatandre kon may spygmomanometer siya aron masusi ang “high blood pressure” ni Ecleo apan dihang wa kini makapresentar nimando ang huwes nga ipadayon ang husay.
Subay niini, nitumbok si Ecleo sa igsuon sa iyang asawa nga si Alona Bacolod nga silang Josebil ug Ben nga maoy naghimo sa alegasyon batok kaniya kay napakyas siya sa paghatag kanilag kwarta.
Nitataw siya nga managlahi ang pamahayag nga nahimutang sa blotter nga gihisgutan ni Josebil batok kaniya.
Gilambigit ni Josebil si Ecleo dihang nakit-an niyang nag-aswat nig itom nga plastic bag sa ilang balay sa Banawa, dakbayan sa Sugbo niadtong gabii sa Enero 5, 2002.
Si Ecleo namahayag nga ang pangangkon ni Josebil dakong bakak kay niadtong higayona diha man siya sa sala sa ilang balay ug gikakuyog niya ang iyang mga sakop sa PBMA.
Midugang siya nga gihimo Josebil ang alegasyon batok kaniya kay gisugo siya sa iyang igsuong si Ben nga mao kadtoy buhaton nga estorya.
Iyang gitumbok nga si Ben nasuko dihang napakyas siya sa paghatag niinig kwarta. Gani, iyang gikasurprisa nga nasuko niya ang iyang bayaw nga niadto ra mang higayona wa siya makahatag niinig kwarta.
NItataw siya nga ang alegasyon sa magsuong Bacolod mamahimo nga tungod usab sa politika kay niadtong higayona may dakong impluwensya siya sa lalawigan sa Surigao.
Di lang siya campaign manager sa iyang inahan nga si Kong. Glenda Ecleo apan kaalyado usab siya ni Surigao Gob. Lyndon Barbers.
Gihisgutan usab niya ang patayng lawas nga nakit-an sa Dalaguete di sa iyang asawa.
Human sa presentasyon ni Ecleo kagahapon sa depensa, higayon na na sa prosekusyon nga mohimo sa cross examination kaniya.
Apan, wa mohimo ang prosekusyon sa cross examination human nipadayag ang abogado niini nga aduna siyay “high blood pressure” busa sa Oktubre 27 na kini mapahigayon.