MIKABAT sa 27 ka mga pasahero ang naangol sa dihang nahug sa kanal ang ilang gisakyang bus sa alas 12:10 sa udto, niadtong Miyerkules, didto sa probinsiya sa Maguindanao.
Ang kapulisan nag-ila sa mga biktima nga sila si Elsa Fernandez, 49; Jeson Tangle, 18; Leonard Villarosa, 50; Reynante Magbanua, 32; Ibrahim Manalasal. 46; Sato Kambang 35; Reynaldo Bilog, 22; Consolation Badella, 65; Bjay Tambangan, 40; Fe Marasigan, 33; Kasir Mamla, Princess Montawal, 19; Florenda Archeta, 56; Manera Polones, 34; Wilma Malagba, 26; Lea Samillano, 21 ug dunay uban pa nga out patient gumikan kay gagmay nga bun-og lamang ang nahiaguman sa ilang lawas.
Base sa taho gikan sa Maguindanao Police Provincial Office, nga sakay ang mga biktima sa Sofia lll Weena Aircon Bus gikan sa siyudad sa Davao paingon sa Cotabato City.
Apan pag-abot nila sa Barangay Pagagawan, Datu Montawal, mibundak ang makusog nga ulan, unya kalit nga mitakilid ang bus, pagkahuman nabalintong ou nahug sa laom nga kanal.
Dali nga gitabang ang mga samarong pasahero sa mga sakop sa 7th Infantry Battalion sa Philippine Army ug gipangdala sa Kabacan Medical Specialist.
Gibutyag ni Jaype Javilla, konduktor sa Sofia 3 nga hinay lamang ang pagpadagan sa drayber nga si Adam Abuan sa bus apan dako ang iyang pagtuo nga posibling tungod sa dangog nga aspalto nga kalsada ang hinungdan sa disgrasya.
Hinuon nipasalig ang management sa Weena Bus Line nga tabangan ang mga biktima sa galastusan sa balay tambalanan. (Edgardo Fuerzas)