SWERTENG naluwas ang 26 anyos gikan sa tinong kamatayon human gitagod-tagod ang iyang lawas sa suspetsado nga iyang gihagit og away.

Ang insidente nahitabo banda alas 2 sa hapon didto sa Sitio Kalubihan, Barangay San Isidro, lungsod sa Magsaysay, Davao del Sur.

Ang biktima, Almar Autor, ulitawo, ug nagpuyo sa Tulunan, North Cotabato, gihulagway nga maoy nanulong sa balay sa suspek, matod ni Senior Inspector Editho Mandi, hepe sa kapulisan sa Magsaysay.

Ang suspek nga si Reggie Val Elesterio, 21, minyo ug laborer sa ilang lugar, nikuha og pinuti human pugsanong nisulod sa ilang tugkaran ang biktima.

Unang nahitabo ang komprontasyon matod sa kapulisan human ang biktima nanghagit og away ngadto sa igsuon sa suspek.

Sa dihang niinit ang argumento gihulagway nga didto na nikuha sa mahait nga hinagiban ang suspek ug gitagod-tagod ang nagkadaiyang parte sa lawas sa biktima.

Naluwas ang biktima sa dihang gidali pagdala ngadto sa Davao del Sur Provincial Hospital (DDSPH).

Wa hinuon mahago ang kapulisan nga nitubag sa alarma sanglit gilayong nitahan ang suspek pagkakita kanila.

Sa lugar diin nahitabo ang krimen, narekober sa kapulisan ang kapin kon kulang 18 ka pulgadang sundang nga gigamit sa suspek sa pagpanigbas.

Samtang anaa sa kustudiya sa kapulisan si Elesterio gihan-ay na sab ang kasong “frustrated murder” batok kaniya. Ang suspek padayon sab nga giatiman sa mga doktor didto sa ospital. (Dondon Dinoy)