NAGPABILING “zero” ang talaan sa Davao del Sur Provincial Police Office (DDSPPO) tungod kay wa pay bisan usa nga natala sa paglapas sa election gun ban sa lalawigan.

Sukad gisugdan ang pagpahamtang sa gun ban, usa ka bulan una ang eleksyon sa barangay niadtong Septembre 25, wa pay bisan usa nga nadakpan luyo sa mga kasong pagpamatay sa lalawigan.

Ang uwahing insidente sa pagpatay nahitabo didto sa national highway sa Barangay Cabligan, sakop sa lungsod sa Matanao, Davao del Sur.

Mga suspek gihulagway nga nagpakyaw og motorsiklo gikan sa dakbayan sa Digos ug nagpusil patay sa drayber sa gipakyaw nga motor sanglit karnaping ilang tuyo.

Human sa insidente yanong nisibat ang mga suspek padung sa lungsod sa Bansalan, Davao del Sur.

Hugot ang mando ni Senior Supt. Ronald dela Rosa, provincial director, nga magmuntar og checkpoint ang kapulisan diha sa kadalanan aron mapatuman ang election gun ban.

Mga armado nakasibat human nahimo ang krimen.

Sagad sa mga kriminal armado nga mobiyahe sa kadalanan gamit ang motorsiklo apan way pa nakasikop ang otoridad bisan usa kanila.

Subling gi-alerto ni Dela Rosa ang tanang hepe sa probinsya nga dakpon gyud ang mga tawong magdala-dala og armas samtang gilusad ang kampanya sa gun ban nga matapos sa Nobyembre 10.

Sa talaan sa Philippine National Police didto sa Camp Crame niabot na sa 219, ang lima sakop sa PNP, tulo sab ka military personnel, siyam ka mga government employees ug 202 mga sibilyan ang nasikop gikan sa managlahing dapit sa nasud.

Ang datos gitaho ni Philippine National Police (PNP) spokesman Agrimero Cruz Jr. sa National Election Monitoring and Action Center (Nemac).

Usa ka adlaw o 24 oras sab ang mando sa PNP nga mohimo og checkpoint diha sa kadalanan aron masigurong di makalusot ang mga malapason sa balaod.

Gipasiatab sa PNP nga 2,000 ka mga checkpoints ang ilang imuntar sa nagkadaiyang dapit sa nasud Pilipinas aron magmalinawon ang SK ug Barangay Elections karong Oktubre 25. (Orlando B. Dinoy)