USA sa duha ka mga “extortionists” ang napatay human siya misukol sa mga pulis nga naglusad og “entrapment operation” sa alas 4:40 sa hapon niadtong Miyerkules.
Ang insidente nahitabo sa kanto mga dalang Rosemarie ug Bangoy, Barangay Kapitan Tomas Monteverde, distrito sa Agdao, siyudad sa Davao.
Namatay samtang gitambalan sa mga doktor sa Southern Philippines Medical Center (SPMC) mao si Michael Lutz, hamtong ug nagpuyo sa Nidea Street, Bo. Obrero, ning siyudad.
Basa sa blotter sa Sta. Ana Police Station, si Lutz gisikop sa mga pulis kauban ang iyang higala nga si Ben Dela Peña, 44, minyo, laborer ug nagpuyo sa Solaiman Street, Barangay Kapitan Tomas Monteverde.
Ang duha gisikop pinaagi sa entrapment operation nga gilusad sa mga sakop sa Regional Intelligence Division uban sa mga personahe sa Sta. Ana Police Station nga gipangulohan ni PO3 Richard Dionisio.
Ang entrapment operation gilusad human gireklamo ang duha nga nangilkil og salapi kang Nathaniel Fernandez Tan, tag-iya sa NATS Performance Shop nga nahimutang sa R. Castillo Street, Agdao.
Atol sa maong operasyon, milanit si Lutz sa iyang .38 kalibre nga revolver dayon gipusil ang mga pulis nga miaresto kanila hinungdan nga mibalos ang mga pulis hangtud nga naigo ang suspetsado sa iyang dughan ug kamot.
Si Lutz gidala sa SPMC aron patambalan, apan ang progress report sa kapulisan kagahapon, nagpahibalo nga namatay siya samtang giatiman sa mga doktor sa maong tambalanan.
Nakuha sa kapulisan gikan kang Dela Peña ang “marked money” nga gigamit sa mga otoridad sa maong operasyon.
Sa sa pagsuwat ning balita, si Dela Pe¤a atua karon gipriso sa selda sa presinto uno, samtang gipahiluna ang patay'ng lawas ni Lutz sa usa sa mga punerarya dinhi sa siyudad. (AD)