WA NANUMBALING ang mga mamumuno ning panahona sa total gun ban nga giimplementar sa mga otoridad hinungdan nga nakabuno na sab og laing biktima sa alas 5:30 sa hapon niadtong Miyerkules.
Ang insidente nahitabo samtang naglingkod ang biktima sa nakaparada nga motorsiklo nga dunay sidecar sa basketball court didto sa Anthorium Street, Kabacan, Ecoland, siyudad sa Davao.
Ang biktima giila sa kapulisan nga mao si Jerby Layang Basay, 19, ulitawo, laborer ug nagpuyo sa Purok 23-C, Sabroso Village, Ecoland, ning siyudad.
Base sa blotter sa Talomo Police Station, ang biktima gipusil sa wa mailhing tawo samtang nalingaw sa pagsaksi sa duwa nga basketball didto sa Anthorium Street, Kabacan, Ecoland.
Si Basay naigo sa ulo hinungdan sa iyang pagkatumba dayon nakabsan sa kinabuhi, sigun sa mga mirespondeng sakop sa Scene of the Crime Operatives (Soco).
Mga nakasaksi sa maong hitabo naglarawan sa killer nga 5'1" ang gitas-on, kasarangan ang panglawas, nagsul-ob og itom nga jacket, kalo ug maong nga pantalon.
Giingon nga human sa pagpamusil, daling mibiya ang mamumuno sa nahitaboan sa krimen dayon mipaingon sa wa masayri nga direksyon.
Ang patay'ng lawas sa biktima atua karon gihaya sa Angel Funeral Homes, F. Torres Street, ning siyudad.
Mga imbestigador sa Talomo Police Station nagsusi na sa mga anggulo sa maong hitabo aron sayron kung kinsa ang mihunos sa kinabuhi sa biktima.
Sama sa naandan, naninguha ang kapulisan nga masikop ang mamumuno aron taralon sa korte tungod sa iyang sala nga nahimo. (Alger Dura)