NAGPABUGWAK og nagdilaab nga opensa ang Cebu Eastern College (CEC) Dragons sugod sa tungatungang bahin sa 2nd quarter aron ipanglampornas ang Sacred Heart School-Ateneo de Cebu (SHS-AdC) Magis Eagles, 87-70, kagahapon sa Game 1 sa high school division championship best-of-five series sa Cebu Schools Athletic Foundation Inc. (Cesafi) sa Cebu Coliseum.
Gikan sa 31-30 nga labaw, nagkumboya sila si Nike Montalvo, Marven Bauya ug Roy Vilarias aron pasutuyon ang opensa sa Dragons nga maoy nag-inat sa ilang bintaha, 42-32, sa hinapos nga bahin sa 3rd quarter.
Nagpadayon ang kainit nila ni Montalvo, Bauya ug Villarias sa 3rd quarter unya ning higayuna, ningtabang na sila si James Sumayang, Banjmain Zosa, Raymund Sypongco, ug Mark Anthony Olayon hinungdan nga nasumpayan pa ang labaw sa Dragons, 71-51, sa sayong bahin sa 4th quarter.
Wala gyud ninglubad ang kabangis sa Dragons samtang Magis Eagles nagsalimoang og maayo ug daghan kaayo sila’g sipyat sa ilang mga tira sa gawas.
Ang Magis Eagles, nga ningpukan sa Dragons, 84-79, sa single round-robin semi-finals, wala na gyud nakabangon hangtod na sa katapusang gutlo.
Lima ka mga magduduwa sa Dragons ang ningmugna og dobleng numero nga puntos nga maoy naghatag og unod sa ilang balanseng ataki.
Nipugnit og 14 puntos kada usa sila si Montalvo, Villarias, Zosa, ug Bauya samtang nidugang og 10 puntos si Sypongco alang sa Dragons.
Ang Magis Eagles gipangulohan ni Adrian Muller pinaagi sa iyang 23 puntos samtang niamot og 15 puntos si Adven Diputado.
Ning pagsuwat, padayon pang nagsangka sa main game ang 9-time champion University of the Visayas (UV) Green Lancers ug University of Cebu (UC) Webmasters sa Game 1 sa kaugalingon nilang championship series sa college division.
Puntos kada usa
CEC (87)- Montalvo 14, Villarias 14, Bauya 14, Zosa 14, Sypongco 10, Sumayang 8, Olayon 8, Regidor 2, Abecia 2, Villarosa 1, Nuevos 1
SHS-AdC (70)- Muller 23, Diputado 15, Abbu 9, Ochea 6, Bacaltos 5, Sing 5, Asilom 5, Cadavis 3.