Chito E. Germino
Paknaan, Mandaue City, Cebu
BAKAK man na, Attorney! Tudloan diay ko nimog pamakak? Makasala na ko ana!” matod ni Sister Edith nga gigil-asan nga naglingkod sa lingkuranan dikit sa lamesa ni Atty. Rudy Gabucan sulod sa iyang bupete. Nangunsulta ang madre kon unsay paagi aron dali rang mahulipan ang titulo sa yuta sa ilang kapunongan nga nawala.
“Kon di ka mamakak, di masulbad imong problema,” ni Rudy nga seryusong mitambag sa madre. “Pero, ayaw kabalaka. Bisag mamakak ka pa, di ka kasala.”
Nahatutok pag-ayo ang madre sa abogado. Dili ma-drowing ang nawong, kon nagminghoy, naglibog o nahibulong ba.
Mikumpisal ang madre sa abogado sa iyang problema ning sayong kahapunon. Naminaw pag-ayo ang abogado sa asoy sa madre. Gipiyalan si Sister Edith sa titulo sa yuta sa Sisters of James Monastery, kapunongan sa mga madre. Si Mother Sophia, ilang madre superyora, ang nagpiyal sa titulo aron mabaligya ang yuta. Ang halin gastuhon para sa ‘expansion’ sa eskuylahan nga gidumala sa mga madre, ang St. James Academy nga anaa sa barangay Cuyabo ning dakbayan.
Gihatag ni Sister Edith ang titulo ngado kang Godofredo, iyang higala nga nangahente og yuta. Mipasalig ang ahente nga di dangtag semana, makakita na siya og buyer. Apan milabay na lang ang usa ka bulan wa gyuy ‘update’ ang ahente. Unya nabasahan na lang niya sa SUPERBALITA nga ‘wanted’ na si Godofredo kay daghang giatubang nga kasong ‘estafa.’ Napatik ang ngalan ug hulagway ni Godofredo uban ang tanyag nga dakong ganting salapi sa makahatag og impormasyon kon hain siya magtago.
Nakauna og kakita og buyer si Mother Sophia. Gipaninglan niya si Sister Edith sa titulo. Naghilak si Sister Edith nga mitug-an sa madre superyora sa nahitabo. Suspensuhon si Sister Edith og unom ka bulan kon di mahibalik ang titulo sulod sa upat ka bulan. Posible nga mataktak siya sa trabaho sa eskuylahan ug may uban pang silot. Mao nga napugos siyag duol og abogado.
“Angkuna na lang nga ikaw ang nakawala. Mopirma kag Affidavit of Loss, nga ikaw ang nakawala sa titulo. Kay kon motug-an ka sa tinuod, pa-subpenahan sa huwes si Godofredo aron pangutan-on kon naa ba kaniya ang titulo. Bisag lima ka tuig, di ka kapaguwa sa titulo. Petisyunan man lang na sa husgado nga paisyuhan sa Register of Deeds og bag-ong titulo hulip sa nawala,” taas-taas nga pagpasabot ni Rudy sa madre.
“Sala lagi ang pagpamakak, Attorney!” insister ni Sister Edith.
“Ang nakadaot sab ninyong mga madre kay way basa-basa sa Bibliya. Ako, sa di pa ko mobasag ‘law books.’ Bibliya akong unahog basa,” ni Rudy nga nagpahiyom.
“Bi, probaha kuno nga di ko makasala ining problemaha,” ni Sister Edith.
“Thou shalt not bear false witness against thy neighbor. Ayaw pagbutang-butang batok sa imong isigka tawo. Mao ni ang ‘commandment’ batok sa pagpamakak, di ba?” ni Rudy.
“Oo, sakto ka, Attorney.” ni Sister Edith.
“Karon, moangkon ka na nga ikaw ang nakawala sa titulo? Pananglitan, moingon ka lang god nga nabiyaan nimo sa taksi ang titulo,” sugyot ni Rudy.
“Bakak lagi na, Attorney!” ni Sister Edith.
“Patiwasa una kog sulti. Sa pag-angkon nimo nga ikaw ang nakawala, nagbutang-butang ka batok sa imong kaugalingon, dili sa imong isigka tawo. You bear false witness against yourself, not against your neighbor. Hain man ang ‘violation’ sa commandment ana?” ni Rudy.
Mikipat-kipat ang mga mata sa madre. Miginhawa siyag halawom. Morag kaluksuhon sa kahimuot. Unya mipahiyom siya. Nakasabot na siya.
“Himasa gyud diay kag Bibliya, Attorney.Lupig nimo ang ubang abogado!” ni Sister Edith nga naghiko-hiko.
Mipahiyom lang si Rudy.
“Sige, Attorney. Mopirma na kog Affidavit of loss ug Petition,” ni Sister Edith, nga di na mahadlok mamakak. (Katapusan)