PATAY nang miabot sa tambalanan ang usa ka tawo human nabanggaan ang iyang gimanehong motorsiklo sa alas 7:45 sa buntag niadtong Huwebes.
Ang biktima mao si Eddie Almoren, hamtong ang pangidaron, empleyado sa Tefasco ug nagpuyo sa Purok 5, Barangay Tibungco, siyudad sa Davao.
Base sa imbestigasyon ni SPO1 Wilfredo Cervantes sa Bunawan Police Station, ang biktima nagmaneho sa iyang Honda Wave nga dunay plate number YF-8790 samtang nagsunod sa usa ka Mistsubishi nga dunay plate number GMF-233 paingon sa Bunawan apan dihang miabot sila sa Tibungco kalit miilog sa ilang linya ang Fuso Dropside Truck nga dunay plate number RHA-616.
Ang walang kilid sa truck unang miigo sa Mitsubishi nga gimaneho ni Roberto Abellana, hamtong, minyo ug nagpuyo sa San Juan Panacan, ning siyudad.
Human maigo ang Mitsubishi, gidaro sab sa truck ang motorsiklo ni Almoren hinungdan nga daghang pangos ang iyang naangkon.
Ang biktima daling gidala didto sa Southern Philippines Medical Center (SPMC) apan gideklara sa mga doktor nga dead on arrival siya sa maong tambalanan.
Samtang gipahiluna ang patay'ng lawas sa biktima didto sa Villa Funeral Homes, gipriso sab sa Bunawan Police Station ang driver sa truck nga si Reynold Villaruel, 32, ngapuyo sa Sultan Kudarat.
Gihikay na sa kapulisan ang kasong reckless imprudence resulting to homicide and damage to properties batok sa nakabangga nga drayber. AD