DUHA ka tawo ang namatay samtang laing duha ang grabeng naangol sa pagpamusil sa alas 8:00 sa gabii niadtong Huwebes didto sa Barangay Lapok, Talakag, Bukidnon.

Ang namatay nailhan nga sila si Romeo Salungayan ug usa ka gipanganlan lang og Rey.

Samtang ang naangol ug gidala sa Northern Mindanao Medical Center nailhang sila si Julito Urdinay ug Erlenio Salungayan.

Sigun sa taho gikan sa Bukidnon Police Provincial Office nga nagbaklay lang sa dalan ang mga biktima gikan namista sa dihang girapido ang mga nahisgutan sa wala mailang mga armadong kalalakin-an gamit ang M16 armalite rifle.

Nakaangkon og daghang samad sa ilang lawas ang mga biktima nga nagresulta sa pagkamatay sa duha ka tawo ug pagkaangol sa ilang kauban.

Dali sab nga misibat ang mga armadong grupo sa diha nga ilang namatikdan nga nagresponde na ang puwersa sa Citizen Armed Forces Geographical Unit uban ang militar.

Hangtud karon blangko pa ang otoridad sa motibo sa hitabo hinungdan nga padayon ang ilang imbestigasyon ug aron sa pag-ila sa mga suspek. (Edgardo Fuerzas)