Barangay kapitan patay sa pag-atake sa mga rebelde

USA ka barangay kapitan ang napatay sa pag-atake sa grupo sa mga armado sa alas 7:20 sa gabii niadtong Huwebes didto sa probinsiya sa Cotabato.

Giila sa kapulisan ang biktima nga si Hood Tayuan Hamid sa Barangay Langayen, Pikit sa maong probinsiya.

Samtang samdan sab ang usa ka sakop Civilian Volunteer Organization nga si Kagilon Eskak Akmad, 21, ulitawo ug molupyo sa maong dapit.

Si Senior Inspector Elias Dandan, hepe sa kapulisan sa Pikit, nagsulti nga gisulong sa gibana-banang 30 ka mga armadong lalaki ang pinuy-anan ni Tayuan.

Tungod niini, nahitabo ang bahug-bahog sud sa 20 minutos kay misukol ang mga sakop sa CVO sa pagsung sa mga rebelde.

Gumikan sa kadaghan sa mga rebelde, napatay si Hamid ug miatras ang iyang mga sakop nga CVO.

Nahunong lamang ang pinusilay sa diha nga niresponde ang hiniusang puwersa sa militar ug kapulisan.

Mga rebelde nanagan paingon sa Liguasan Marsh.

Dako ang pagtuo ni Pikit Mayor Sumulong Sultan nga politika ang motibo sa hitabo gumikan sa nagsingabot nga barangay ug Sangguniang Kabataan eleksiyon.

Si Cotabato Governor Emmylou Talinio Mendoza nagmando sa kapulisan sa Pikit nga susihon ang hitabo aron kahatagan og hustisya ang kamatayon sa kapitan. (Edgardo Fuerzas)