DUHA ka mga tulisan nasikop sa mga otoridad human nakigpinusilay ug nakig-ginukdanay sa mga pulis didto sa Barangay Alejal, lungsod sa Carmen, Davao del Norte, Huwebes sa buntag.

Nailhan ang mga dinakpan nga mga suspek nga mao sila si Ricky Paulbe, 37, ug si Alejandro Campanas, hamtung ang panuigon.

Sa report gikan sa Davao del Norte Police Provincial Office, nasayran nga pasado alas 6:00 sa buntag gitulis unta sa duha ka mga suspek ang biktimang si Roferos Dagaas didto sa maong lugar.

Mga suspek sakay sa usa ka Honda Wave nga motor ug bugtong cellphone sa biktima ra ang nakuha nila tungod kay mihana na unta sa pagsibat human nakatimaho nga taliabot ang mga pulis.

Mga sakop sa Carmen Municipal Police Station nga nakadawat dayon og taho bahin sa maong hitabong pagpanulis wa naglangan miresponde dayon pinanguluhan ni Police Inspector Alfredo Rubrico.

Dihang naapikihan sa mga pulis didto sa Barangay Alejal, ang mga suspek giingong misukol ug nahitabo ang panagginukdanay ug pinusilay tali sa kapulisan.

Apan way swerting naigo ang suspek nga si Paulbe sa iyang batiis, hinungdan nga nasikop dayon siya sa mga otoridad.

Nakuha gikan sa posisyon sa mga dinakpan ang kalibre .38 revolver nga dunay unom ka mga buhing bala, usa ka yunit nga cellphone nga gituohang iya sa biktima ug 45 ka mga buhing bala sa kalibre .357 revolver. Nasikop usab dayon ang iyang kauban.

Si Paulbe gidala sa Davao Regional Hospital sa siyudad sa Tagum aron mapatambalan samtang si Campanas gitanggong sulod sa selda.

Kapulisan sa lungsod sa Carmen mihimo na karon og dugang pakisusi sa maong hitabo.

Samtang ang kasong robbery ug illegal possession of firearms in relation to Comelec gun ban, gihikay sa kapulisan batok sa mga dinakpan. (Marvin Pineda)