PAREHONG mopunterya og 2-0 nga bintaha ang University of Cebu (UC) Webmasters ug Cebu Eastern College (CEC) Dragons sa ilang pagpakigbatok og lainlaing kontra sa Game 2 sa mga championship series sa college ug high school divisions sa 2010 Cebu Schools Athletic Foundation Inc. CESAFI caging karong hapon sa Cebu Coliseum.
Ang Dragons makigharong og balik sa Sacred Heart School-Ateneo de Cebu (SHS-AdC) Magis Eagles sa ikatulong duwa samtang ang Webmasters makigsangka sa 9-time champion University of the Visayas (UV) Green Lancers.
Sa Game 1, nausikan sa Webmasters ang ilang 15-0 nga labaw apan nagpakalig-on sila sa hinapos nga bahin sa pagpangulo sa ilang higante nga si Junmar Fajardo aron lupigon ang Green Lancers, 72-66.
Taas na gyud kaayo og moral ang Webmasters kay kini maoy ikaduha nilang sunodsunod nga kadaugan batok sa Green Lancers ug seguradong dili gyud sila mohatag og kahigayunan nga makabangon ang labing labing gikahadlukang puwersa sa liga.
Apan alang sa Green Lancers, nga karon pa sukad nakasuway’g pildi sa Game 1 sa usa ka finals series, malaumon gihapon silang makabangon ug dag-on ang ilang ika-10 nga sunodsunod nga korona.
Gipasabot ni Green Lancers coach nga maayo lang gyud kaayong nakaduwa ang Webmasters sa Game 1.
“Nangigo ang ilang outside shooters maong naglisod gyud mi sa Game 1 kay naa pa gyud si Fajardo sa ilawom,” matod ni Cabahug. “Kuyaw gyud na ang UC kon mangigo ang ilang shooters.”
Nidugang si Cabahug nga gidasig niya ang iyang mga batos pinaagi sa paghatag niini og duha ka mga senaryo – ang mahimo silang labing una nga makakuha og 10 ka titulo o ang mahimo labing una nga Green Lancers team nga dili makampiyon.
“Ako silang giingnan nga there’s always a first time. First time mi nga napilde sa Game 1 sa finals. Kon dili sila mahimong first time UV team nga dili ma-champion, kinahanglan gyud nilang maninguha og maayo,” dugang ni Cabahug.
Hinuon gitataw ni Cabahug nga wala ra mahagsa ang abaga sa iyang mga magduduwa human sa kapakyasan nila sa Game 1 ug malaumon gyud gihapon kaayo ang iyang puwersa.
Sa laing bahin, magsangka ang UV Baby Green Lancers ug UC Baby Webmasters sa premirong duwa alang sa Game 2 sa ilang third place best-of-three series sa high school division.
Unya mosunod ang engkuwentro sa University of San Carlos (USC) Warriors ug Southwestern University (SWU) Cobras sa Game 2 sa kaugalingon nilang third place series sa college categories. ESL