Durano: Siyagit sa kamingawan

HUMAN mihagsa ang power supply sa Sugbo tungod sa line-fault problem sa National Grid Corp. ug ang pagkahagtos sa mga pipila ka mga planta sama sa Cebu Energy Development Corporation, Cebu Thermal Power Plant, Mahanagdong Power Plant sa Leyte ug Palimpinon Geothermal Power Plant, miabot gyud og 276 Megawatts ang atong power deficit nga nakamugna usab og duha na ka oras nga rotation brownouts sa kinatibuk-ang franchise area sa Visayan Electric Company lukop Metro Cebu.

Ang nakaparat ning atong kahimtang kay wala pay kahayag sa unahan nga hingpit na kining masolusyunan sa daling panahon kay mismong si Department of Energy for Central Visayas Regional Director Antonio Labios ang miangkon nga dili sila makapasalig nga walay black-out nga matigayon aton unya sa pagpahigayon sa Barangay ug Sanguniang Kabataan Elections karong Oktobre 25.

Gani bisan pa man og mahibalik na sa normal ang operasyon sa tanang mga planta sa kuryente, tungod kay ang sumada total sa kinatibuk-ang alkanse sa gitawag og Visayas grid ang mokabat man sa 320 Megawatts, ang ikahatag sa maong mga power plants moabot man lang og 240 Megawatts mao nga aduna gyud gihapo’y kakuwangan nga 80 Megawatts.Tungod niini, walay laing mahimo ang mga nag-antos nga mga kunsumidor gawas sa pagpunay og balikas sa VECO nga mao ray ilang nailhan unya kining maong reklamo nahisusama sa siyagit sa kamingawan nga walay tsansa nga madunggan aron puhon kahatagan og dinalian og tukma nga kasulbaran.

Samtang ang isyu sa enerhiya usa ka importanteng panginahanglan dili lamang sa atong inadlaw-adlaw nga panginabuhi kon dili mao usab kini ang magahatag og pwersa sa nasod alang sa paglambo sa atong industriya og komersiyo. Ning talagsaong kahimtang karon sa atong power shortage daw walay nakitang emerhensiya ang Department of Energy og ang gobyerno sa kinatibuk-an sa paghatag og short term ug long term solution ning maong krisis.

Mao hinuoy sigehan og pangandak nga daghan na sila’g naimbetar nga mga langyaw nga mga kompaniya mobubo og puhunan dinhi sa ato unya kini magahatag og igong kahigayon sa pagpangimpleyo sa atong katawhan. Unsa may pulos ning maong pagpang enganyo kong dili nato masulbad kining atong problema sa atong power supply kay seguro man gyud nga maturn-off ang bisan kinsang investor kun makasinati na sa dili mabangbang nga power black-out.

Tungod usab sa system’s ineffeciencies, ang atong presyo sa kuryente ang pwerteng mahala, gani ikaduha man kita sa nasod sa Japan kon sa kataas sa kantidad sa balayranan sa kuryente ang hisgutan unya ang atong serbisyong nadawat ang wala gyuy hinungdan.

Kon ang problema sa enerhiya ang pabiling dili masulbad, wala sab kita’y mapaabot nga nga kaugmaon nga mahayag kay mao man kini ang magdeterminar sa atong work output ug global competitiveness nga subo kaayong gilingug-lingogan lang sa mga nangatungdanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph