Nadela: Mga tinun-an naapiki

NATANDOG ko nga naminaw sa sugilanon sa mga tinun-an sa elementarya nga biktima sa sunog sa Barangay Sambag 1, Cebu City. Ilang giasoy nako kong giunsa nila pagpaningkamot pagsalbar sa ilang mga gamit sa eskuwelahan taliwala sa nagdilaab nga kayo. Ang pait pipila lang ka pudyot ang ilang nahipos, kadaghanan naabo sama sa ilang uniporme, sapatos, libro, notebook og mga bag. Gumikan niini napugos sila pag-absent sa klase gikan niadtong Lunes hangtod kagahapon. Diha pa man gani nangumedya nga gimingaw na daw sila sa ilang mga maestra og classmates.

ABSENT

Nganong kinahanglan pa mang mo-absent kining maong mga bata? Kini nga pangutana gusto nakong ipatubag sa taga DepEd ug sa Cebu City Hall.Tinuod di sayon kining masunugan kita. Ang tanan natong gimbuhaton apil na gani ang panginabuhi mapagan. Pero kining edukasyon para nako di mahimong kompiyansahan. Kinahanglan nga di gyud unta ni mapagan. Ang akong sugyot duna unta’y motutuk sa panginahanglan sa mga bata kong dunay sunog nga mahitabo. Di kay kutob ra ang taga DSWS sa pagpanglista sa mga nasunugan.

Lahi-on unta nila ang panginahanglan sa mga tinun-an aron nga di mataas taas ang ilang pag-absent sa klase. Pananglit duna nay stock nga notebook, papel og ubang kagamitan ang city hall, kini maoy ilang  dalion pagpang-apod-apod aron malikayan nga ma-absent ang mga bata.

COLLEGE

Sa college sab nalipay ko nga nagtan-aw sa mga tinun-an sa Southwestern University nga naghatod og mga hinabang alang sa ilang mga kauban nga biktima gihapon sa sunog.

Gipasalig ni Capt. Jose Tiglao ang Vice President for Administration sa SWU nga kutob sa ilang mahimo ilang tabangan ang ilang mga tinun-an aron di mabalda ang ilang pagtoon. Naglakip kini sa uban pang panginahanglan sama sa bayranan sa eskuwelahan og legal assistance alang sa mga affidavit sa mga butang nga naapil og kaugdaw. Mao sab ni ang gusto nako pasaw-an sa ubang unibersidad ug kolihiyo. Kong dunay sunog o katalagman diin mapagan ang inyong mga tinun-an, automatic na unta na nga sila katunolan sa gikinahanglan nga tabang.

REUNION

Human sa sunog naghangop ang mga silingan ni Lola Gleceria  Garcia ug mga silingan.

Si Lola Gleceria man gud unang gika report ni SFO2 Nilo Daculan nga na-trap. Mao nga amo siya nga gipangita hangtod nga dunay nagsulti kanamo nga nakabiya na diay siya padung sa Banilad sa wa pa ang sunog.Niadtong Huwebes nagkita mi ni Lola Gleceria sa Sambag 1 gym og kalmado kaayo niyang gi-asoy kanako ang iyang kasinatian apil na kadtong mga kabalaka nga mitumaw atol sa alarma sa sunog. Samtang nagsud-ong ko sa iyang kahimtang nakaingon ko nga angayan lang sab nga wa siya atol sa alarma.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph