TUNGOD tingali kay petsa 8 kagahapon, ang mga buhatan sa Commission on Elections (Comelec) sa tulo ka mga dakbayan sa Metro Cebu ang gidagsa mga kandidato sa barangay ug Sangguniang Kabataan (SK) elections.

Sa Cebu City north district nga gidumala ni Atty. Marchel Sarno, sila nakadawat og di mominos 500 ka mga certificate of candidacy (COC) sa mga magpapili sa pagka pangulo sa barangay, modagan pagka SK chairman ug SK councilors.

Kini subay sa pag-ihap ni Renren Villegas, secretary ni Sarno.

Samtang sa Cebu City south district ni Atty. Edwin Cadungog susama gihapon ang nahitabo.

Si Gemma Sta. Rosa nagkanayon nga kagahapon ang labing daghang kandidato ang ningduso sa ilang CoC.

Base sa ilang talaan miabot na ngadto sa kapin sa 200 ka mga magpapili sa pagka konsehal sa barangay ug 30 ka mga magpapili isip barangay chairman.

Si Villegas nagkanayon nga gumikan sa tuo-tuo sa mga pulitiko nga ang petsa 8 maayong petsa alang sa ilang gipangandoy hinungdan nga gidagsa ang Comelec office kagahapon.

Sa dakbayan sa Mandaue, way putol nga gidagsa ang buhatan sa Comelec niadtong mga tawo nga gustong magpapili sa pagkabarangay kapitan, konsehal ug SK.

Sagad sa mga nisang-at na sa ilang certificate of candidacy mao ang mga incumbent barangay official.

Si Kapitan Maria Editha Montesa sa barangay Jagobiao niingon nga nasabotan sa ilang grupo nga sila mosang-at kagahapon kay ang petsa 8 maoy iyang paboritong numero sanglit petsa 8 man siya natawo.

Sa iyang bahin si Andrey Suson sa barangay Pagsabungan nihulagway nga ang numero 8 suwerti alang kaniya. (PAC)