PATAY ang usa ka kanhi taas nga opisyal sa Moro National Liberation Front (MNLF) lakip na iyang asawa sa pagpamanhig, alas 2:00 sa hapon, Biyernes, didto sa probinsiya sa Sultan Kudarat.

Nailhan ang mga biktima nga sila Abdullah Calapia ug Raida, mga molupyo sa Barangay Poblacion, President Quirino sa maong probinsiya.

Sa nahagpat nga taho gikan Sultan Kudarat Police Provincial Office, nasuta nga sakay ang mga biktima sa usa ka owner type jeep gikan sa ilang pinuy-anan paingon sa siyudad sa Tacurong.

Wa damha nga nag-atang na diay nila ang duha ka wala mailhing mga armadong lalaki, way daghang istorya gipamusil sila gamit ang M16 Armalite rifles.

Patay gilayon ang magtiayon human matusak-tusak sa bala ang nagkadaiyang parte sa ilang lawas.

Dali sab nga misibat ang mga suspetsado sakay sa usa ka motorsiklo paingon sa wala matino nga direksyon.

Si Rocaima Antari, igsuon ni Kumander Abdullah nagsulti ngadto sa mga imbestigador nga sa wala pa gipatay ang mga biktima may nadawat silang hulga gikan sa wala mailhing grupo.

Gidugang ni Antari nga si Calapia dunay plano sa ilang dapit nga magpapili pagka-kapitan sa nagsingabot nga barangay ug SK election.

Gibutyag ni Senior Inspector Celestino Daniel Jr. nga hangtud karon blangko pa sila kon kinsa ang mga suspetsado nga mipatay sa biktima, nagpadayon pa sab ang ilang imbestigasyon sa kaso. (Edgardo Fuerzas)