USA ka lalaki nga nag-atubang og kasong lugos nasikop sa kapulisan didto sa lungsod sa Matanao, Davao del Sur.

Ang suspek gibalhog gilayon sa prisohan.

Dugay rang gipangita sa kapulisan ang suspek nga si Edwin Zamora, 25, ulitawo ug molupyo sa Barangay Sinaragan, Matanao, kinsa nag-atubang og duha ka kasong lugos didto sa probinsiya sa North Cotabato.

Si Zamora nasiplatan sa kapulisan nga nagtago-tago sa maong lugar.

Sila si Senior Police Officer 3 Leonilo Canque Jr., kuyog ang tropa sa kapulisan, nilihok dayon sa pagsilbi sa warrant of arrest nga gipagula ni Judge Rogelio Narisma sa Regional Trial Court (RTC) Branch 17 sa siyudad sa Kidapawan.

Niadtong petsa 23 sa buwan sa Septyembre gipaguwa sa korte ang mandong pagsikop sa suspek sa giatubang nga kasong lugos nga nakadoket sa criminal case number 327 ug 328 (2010) didto sa North Cotabato.

Dihang nasiplatan nga nipauli sa ilang lugar, gisundan gilayon sa kapulisan ang suspek.

Gibalhog na sa Matanao police ang suspek apan gitakdang ihatod ngadto sa lugar diin nahimo niya ang sala samtang pahibaw-on sab sa otoridad ang korte nga siya nasikop na. (Dondon Dinoy)