ANG kauban sa napatay nga “extortionist” kinsa nasikop sa mga pulis, gidemanda na sa kapulisan didto sa City Prosecutor's Office (CPO) niadtong Huwebes.
Gidemanda mao si Ben Villa Dela Peña, 44, minyo, nagpuyo sa Soliman, Blk. 2, Barangay Kapitan Tomas Monteverde, distrito sa Agdao, siyudad sa Davao.
Si Dela Peña nag-atubang karon og kasong robbery ug extortion human siya nasikop sa “entrapment operation” nga gilusad sa kapulisan human sila gireklamo nga nangilkil og salapi kang Nathaniel Fernandez Tan, tag-iya sa NATS Performance Shop nga nahimutang sa R. Castillo Street, Agdao.
Si Dela Peña gisikop uban si Michael Lutz, hamtong ug nagpuyo sa Nidea Street, Bo. Obrero, ning siyudad apan misukol ang nauwahi hinungdan nga gipusil siya sa mga sakop sa Regional Intelligence Division (RID) sa alas 4:40 sa hapon niadtong Miyerkules.
Ang insidente nahitabo sa kanto mga dalang Rosemarie ug Bangoy, Barangay Kapitan Tomas Monteverde, distrito sa Agdao, siyudad sa Davao.
Atol sa maong operasyon, milanit si Lutz sa iyang .38 kalibre nga revolver dayon gipusil ang mga pulis nga miaresto kanila hinungdan nga mibalos ang mga pulis hangtud nga naigo ang suspetsado sa iyang dughan ug kamot.
Si Lutz gidala sa Southern Philippines Medical Center (SPMC) aron patambalan, apan ang progress report sa kapulisan kagahapon, nagpahibalo nga namatay siya samtang giatiman sa mga doktor sa maong tambalanan.
Human sa maong entrapment operation, gidala dayon sa mga pulis ang suspetsadong si Dela Peña didto sa Sta. Ana Police Station.
Ang suspetsado nagpaabot karon sa tukmang adlaw nga taralon ang iyang kaso sa korte. (AD)