DUHA ka mga tawo ang gipamusil samtang usa ang gidunggab sa managlahing hitabo ug lugar dinhi sa siyudad sa Davao.

Sa duha nga gipamusil, usa ang namatay samtang usa ang gitambalan karon sa Southern Philippines Medical Center (SPMC).

Namatay mao Rovic Maurillo, 25, ulitawo, tricycle driver ug nagpuyo sa 6th Avenue, Barangay Kapitan Tomas Monteverde, distrito sa Agdao, ning siyudad.

Si Police Officer 2 Zaldy Rom sa Sasa Police Station nagbutyag sa iyang spot report nga ang biktima gipusil sa alas 8:45 sa gabii niadtong Biyernes atubangan sa Kimberly Store, Mahogany Street, Hillside, Bajada.

Matud ni Rom nga naglingkod lamang ang biktima sa iyang gimaneho nga traysikol sa maong lugar apan kalit miabot ang duha ka tawo nga nagsakay og Honda XRM nga motorsiklo.

Mga nakasaksi nagsulti nga usa sa angkas sa motorsiklo ang mikanaog ug way daghang pangutana gipusil ang biktima tumong sa iyang ulo ug likod nga miresulta sa iyang kamatayon.

Gilarawan ang mamumuno nga nagpangidaron og 30 anyos, 5'2" ang gitas-on, upaw, ug nagsul-ob og green nga jacket ug short pants, sigun sa mga nakasaksi sa maong hitabo.

Nahipus gikan sa crime scene ang duha ka basiyo sa .45 kalibre nga pistola nga maoy gigamit sa mga mamumuno kinsa daling mibiya sa nahitaboan sa krimen.

Samtang gihaya karon ang biktima sa Angel Funeral Homes, gitambalan sab sa SPMC si Odelon Yngayo, 30, electrician ug nagpuyo sa Blk. 54, Barangay 21-C Poblacion, siyudad sa Davao.

Si Yngayo gipusil ni alyas Jef-Jef samtang naglakaw pauli sa ilang balay sa alas 3:00 sa kaadlawon kagahapon, sigun sa imbestigasyon ni Police Officer 3 Richard Dionisio sa Sta. Ana Police Station.

Ang biktima giatangan sa suspetsado kinsa mipusil kaniya apan tiil lamang ang naigo gamit ang .38 kalibre nga revolver.

Nasayran nga alas 10:00 ang takna sa gabii niadtong Biyernes, nagkalalis ang biktima ug suspetsado samtang nag-inom didto sa ilang lugar.

Ang suspetsado giingon nga nagbahad ngadto sa biktima pinaagi sa pagsulti nga: "Bantay ka lang unya" hinungdan nga gipangita siya karon sa kapulisan sa Sta. Ana Police Station.

Samtang gipangita si Jef-Jef, nangita sab karon ang mga sakop sa Talomo Police Station sa duha ka mga tawo nga midunggab patay sa usa ka wa mailhing tawo sa 1:00 sa kaadlawon didto sa Juna Subdivision, Matina Crossing, ning siyudad.

Sanglit way identification card ang biktima, siya gilarawan nga nagpangidaron og 20 hangtud sa 25 anyos, 5'2" ang gitas-on, kulot ang buhok ug nagsul-ob og checkered nga jacket ug short pants.

Si Police Inspector Eugene Castro sa Talomo Police Station nagsulti nga nagsakay ang biktima og motorsiklo nga kolor pula, apan gisundan sila sa duha ka wala mailhing tawo nga nagsakay sab og kolor blue nga motorsiklo kinsa midunggab sa biktima sa makadaghan nga higayon hangtud nga namatay.

Ang biktima atua karon gihaya sa Angel Funeral Homes, samtang ang kapulisan mihimo na og lawom nga imbestigasyon sa maong krimen. (Alger Dura)