Mga duwa karon
(For 3rd place)
2:30 pm- SWU batok USC (srs)
(Championship)
4:00 pm- CEC batok SHS-Ateneo (jrs)
5:30 pm- UC batok UV (srs)
NAG-UNG-ONG na sa pultahan sa kampiyunato ang Cebu Eastern College (CEC) Dragons human nila giusban pagpukan ang Sacred Heart School-Ateneo de Cebu SHS (AdC) Magis Eagles, 69-52, kagahapon sa Game 2 sa high school division best-of-five finals series sa Cebu Schools Athletic Foundation Inc. (Cesafi) basketball tournament sa Cebu Coliseum.
Ang Dragons, nga maoy kulatahunong team sa miaging tuig apan grabeng nagpalig-on karong tuiga, nagkinahanglan na lang modaog karong hapon sa Game 3 aron ibulsa ang makasaysayon ug labing una nilang kampiyunato.
Sa pagpangulo nila ni Nike Montalvo ug Benjamin Zosa, ang Dragons ningdominar gyud dayon sa pagsugod pa lang sa duwa hangtod nga nakaposte sila og 43-26 nga labaw sa halftime ug gikan niadto, wala na sila molingi pagbalik.
Gipangulohan ni Montalvo ang kadaugan pinaagi sa iyang 24 puntos samtang niamot og 19 puntos si Zosa.
Sa laing bahin, hinpit nga naangkon sa University of the Visayas (UV) Baby Green Lancers ang ikatulong puwesto sa high school division human nila giusban paglupig ang University of Cebu (UC) Baby Webmasters, 89-74, sa Game 2 sa ilang best-of-three series.
Samtang ang Southwestern University (SWU) Cobras nakapugos og deciding Game 3 sa inilugay sa ikatulong dapit sa college division human nila gibawsan ang University of San Carlos (USC) Warriors, 56-52.
Ning pagsuwat, padayon pang nagsangka ang UV Green Lancers ug UC Webmasters sa Game 2 sa ilang finals series sa college division.