GIHAGIT ni American trainer Freddie Roach ang sparring partners ni pound-for-pound champion Manny Pacquiao pinaagi sa pagsaad nga mohatag siya’g $1,000 nga pahalipay sa kon kinsa man ang makatumba sa Pambansang Kamao sa Pilipinas.
Niini, gituohan nga dili yanong sparring sessions ang masaksihan sa training camp ni Pacquiao sa Baguio City sa umaabot nga mga adlaw.
Gipasabot ni Roach nga iya kining gihimo aron mopagawas gyud sa tanan nilang makaya ang sparring partners ni Pacquiao.
Nagtuo si Roach nga makatabang gyud ang hugot nga sparring sessions kang Pacquiao, kinsa gikatakdang makigharong kang Mexican Antonio Margarito karong Nobiyembre 13 sa Dallas Cowboys Stadium.
“Yes, I am renewing my challenge to Manny’s sparring partners to make sure they will put up their best in their job to put him in top shape when the fight comes,” matod ni Roach sa interbyu sa www.gmanews.tv.
Dili kini maoy labing unang higayon nga gibuhat kini ni Roach. Iya kining gisugdan dihang nagpreparar pa si Pacquiao alang sa away niini kang Oscar De La Hoya.
Oras pa lang ang nakalabay sa pag-anunsyo ni Roach niini, ang wala’y pildeng si junior-middleweight contender Vanes Martirosyan (28-0, 17KOs), kinsa paingon pang moabot dinhi sa nasod, midawat na dayon sa hagit.
“I am up for Freddie’s challenge. I will be the first to drop Manny,” matod ni Martirosyan, kinsa usa ka Armenian ug sakop sa boxing stable ni Roach.
Sa kasamtangan, ang sparring partners ni Pacquiao mao sila si junior-welterweight Glen Tapia ug junior-middleweight Michael Medina.
Sa laing bahin, nagtuo si Roach nga mapatumba ni Pacquiao si Margarito sulod sa walo ka rounds.
“With the way things are going right now, I’m sure we’re going to knock him out in the eighth. Maybe less (rounds). Nothing has changed in his routine. He is still very strong,” batbat ni Roach.