TING-UWAN na sab. Dangog kanunay ang mga dan, labina sa mga karsada nga wa pa makatilaw og aspalto o semento. Kuyaw magbiseklita ning panahuna, labina sa off road kun kanang batuon ug lapukon nga mga agianan. Mao nang kon mag-assemble ka og mountain bike, ang pagpili og ligid maoy usa sa mga importante kaayo.
Kon magsugod ka sa pagsikad, mas maayong imong planuhon daan kon asa ka gustong mosikad, sa mga bungtod nga offroad o sa patag ug sementadong mga karsada? Dinhi ka magbase kon unsang matanga sa ligid ang imong gikinahanglan.
Matang sa tread sa ligid
Dunay upat ka estilo sa tread sa ligid sa biseklita. Kini mao ang knobby, cutaway, semislick ug bar. Kada usa ani nila dunay maayo ug di maayo.
Ang knobby maayo sa lapok, libaungon nga mga karsada. So far, wa pa ko makatilaw og lukapa ining ligira dihang mao pay akoang gigamit. Maayo kaayo ang iyang traction bisan magdulhog ka pa sa libaungon, lapukon ug napuno sa rain ruts nga agianan.
Hinuon ang knobby di maayo sa mga aspaltado o sementado nga agianan kon ang imong gusto speed. Medyo gahi ang pagtindak labina kon newbie ka pa. Tungod man gud ni sa iyang tread.
Ang cutaways susama ra sa knobby apan sumpaysumpay ang iyang treads. Matod sa akoang pagduki-duki, maayo ni nga ligid sa karsada nga konkreto ug sa lapukon sab nga agianan.
Laing estilo mao ang semislick nga ingnon pa sa uban nga upaw nga ligid. Nakakuyog ko og mountain biker nga migamit ining semislick nga ligid. Ang iyang gilapdon 1.5 pa gyud unya didto mi sa Brgy. Guba dayon misaka sa Brgy. Mabini.Maayo ra man ang pagtungas sa Guba agi sa Binaliw kay konkreto man ang almost all portion sa karsada. Apan kon gikan ka sa Guba padung sa Mabini, offroad gyud ni nga agianan.
Didto iyang nakita ang kakuyaw sa semislick nga ligid kay dangog gyud sa medyo batuon ug lapukon nga agianan. Hinayhinay lang gyud siya pagsikad. Ako siyang giingnan nga mag-ilis og ligid kon ganahan man siya mosubida, mobahada og mga agianan nga di konkreto.
Laing klase sa tread mao ang bar. Ang tread ini uninterrupted busa dangog siya gamiton. Sagad kuno ini gamiton diha sa luyo samtang knobby sa atubangan. So far, ang akoang nagamit mao ang knobby ug bar. Tinuod, kaduha na ko nalukapa sa bar but nice ni kon anha ka sa paved o konkreto nga dan. Karon mibalik ko sa knobby nga 2.1 gihapon, but basin pulihan ka ra sab ni eventually og knobby nga mas nipis.
Tubeless o tube
Kining tubeless mao ni ang ligid nga wa magkinahanglan og interior. Ang naandan ug komon kaayo mao ang ligid nga tube kun dunay interior. Maayo ang tubeless but mahal ni nga matang sa ligid. Gaan ni apan bug-at sa bulsa kay haskang mahala.
Alang gyud sa maayong pagpili og ligid, konsultaha ang imong local bike shop, labina sa ilang technician kon unsay maayo alang nimo.
Mga tinubdan: ezinearticles.com; bikecyclingreviews.com; www.helium.com