Mongaya: Mosaka ang presyo sa kuryente?

PANGANDAM na sab kini alang sa dugang pagsaka sa presyo sa kuryente. Mao kini ang kasagarang sentimento sa mga drayber sa taxi nga akong nahinabi sa mga panahon nga mopauli ko sa Syudad sa Talisay karong bag-o.

Taas-taas man gud nga dagana busa daghan gyud mi og maistoryahan. Ug di malikayan ang brownout kay makaagi man kami og mga lugar nga ngitngit.

Ang nakapait ra ba kay di na inoras ang mga brownout. Moabot na karon og tagurha o tulo ka oras. Unsaon na lang kon magpadayon kini inig abot sa piliay sa barangay.

Bisan pa man, mas makabalaka pa gyud ang umaabot labi na inig kompleto na sa privatization sa National Power Corporation (Napocor) nga maoy gitakda sa Electric Power Industry Reforms Act (Epira).

Kon pribado na ang pagpanag-iya sa tanang mga planta sa Napocor man gud, mawala na ang subsidy sa kagamhanan sa industriya sa kuryente sa nasud.

Tungod niini, gilantaw nga mosaka pag-ayo ang presyo sa kuryente.

Alang kanako, di kini sayop sa mga mga pribadong negusyante nga nang-invest sa power industry. Ang nagsugod sa problema mao kining mga magbalaod nga nagpanday sa maong balaod.

Kahinumdoman, usa sa mga tumong dihang gibuhat ang Epira mao ang pagseguro nga dunay igong supply sa kuryente ang Pilipinas. Apil pa sa mga argumento pabor sa Epira niadtong panahona nga kuno mobarato ang presyo sa kuryente sa panahon nga modaghan ang moapil sa industriya dihang mabuak ang dakong monopolyo nga mao ang Napocor.

Apan unsay nahitabo karon, grabi ang kakulang sa atong supply ug nagsigi sa pagsaka ang presyo.

Angayan na gyud nga molihok ang tibuok kagamhanan aron masulbad kining mga problema sa industriya.

RECTOR MAJOR

Dakong balita ang gisulti diri kanako ni Customs District Collector Ronnie Silvestre dihang naabot siya gikan sa Rome sa miaging semana.

Didto siya nitambong sa kalibotanong tigum sa mga alumni sa mga tunghaan ni Don Bosco iyang nasayran nga sa sunod semana, mobisita dinhi ang rector major sa tanang mga Salesians.

Preparasyon kini alang sa umaabot nga pagbisita sa relic ni Saint John Bosco sa Pilipinas ug usa sa iyang suroyon mao ang Sugbo.

Sa pagkakaron, nag-organisa na ang mga negusyante nga mga Bosconian diha sa Bosconian International Chamber of Commerce (BICC) nga mag-induction karong Oktubre 16, 2010 anha sa Laguna Garden Cafe sa Terraces sa Ayala Center Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph