MATOD pa sa mga matuhu-tuhuon nga suwerte kuno karong adlawa gumikan kay triple 10. Ang Oktobre, ika-napulo nga buwan sa tuig. Unya petsa 10 ug 2010. Busa 10/10/10. Motumaw lang kining maong triple 10 matag siglo o one hundred years. Sunod gawas ani unya na sa October 10, 2110. Wala na ta dinhi sa kalibutan nianang panahona.

Matod pa sa mga numerologists nga adunay tulo ka mga scenario o situwasyson ang posibling mahitabo ning maong adlaw. Sa iningles pa; 1) something good happens; 2) nothing happens; 3) something bad happens. Hubad. Posibling adunay maayong mahitabo sa matag usa kanato; walay mahitabo ug adunay dautang mahitabo.  Aw, mahulog ra gihapon kini sa tagna-tagna.

TAIWAN

Didto sa Taiwan, adunay significance o kabililhon kining maong adlaw kay ila kining gisaulog ug gani national holiday karon nila. Ang numero 10 nagkahulogan og pagtapus. Nagkahulugan kini nga pagtapos sa usa ka cycle ug pagpangandam alang sa kabag-uhan. Ispisyal nga adlaw karon sa mga Taiwanese.

Sa mga natawo karong adlawa, matod pa, sa ilang Zodiac sign, adunay mapaabot nga grasya. Ang mga Librans adunay igong respito sa ilang isig ka ingon ug lig-on ingon man matinud-anon kon mahigugma. Kasagaran sa mga natawo karon nagmalampuson sa ilang negusyo. Makab-ot gyod ang kalampusan kon magtinarong lang. Pero motrabaho lang gihapon kita ug dili magtinapulan aron ta molampos.

DILI SERYOSOHON

Kining mga ingon aning pagtuo sama sa prediction o tagna-tagna, card reading, panghimalad ug bolang kristal isipon lang nato nga lingaw-lingaw sa kinabuhi. Sa ininglis pa, form of entertaintment. Dili lang nato seryosohon ha. Kay bisan kanang mga nagbuhat niana sama nilang Madam Auring ug uban pa, wala usab kana sila masayod sa ilang ugma. Dili lang ta magsalig pinasikad niining mga tagna-tagna.

Kining maong adlaw karon isipon lang nato nga ordinaryong adlaw. Ug dunay mahitabo kanato nga maayo, aw, okey. Kon dili maayo, aw, dimalas. Ang Labaw’ng Makagagahum ra ang nasayod sa tanan kay siya man usab ang nagbuot sa tanan. Kanang suwerte moabot kana inubanan sa pag-ampo ug sa samang higayon ang dimalas malikayan ra usab pinaagi sa pag-ampo. Praise the Lord.

(bgnalzaro@gmanetwok.com)