Dunay grupo nga nag-aghat kang Gobernador Gwendolyn Garcia sa paglansar pagka senador sa 2022 elections. Tubag sa gobernador nga ang pagtukod sa grupo way pagtugot kaniya.
Panahon na ba nga ang gobernador magpapili sa mas taas nga posisyon? Dili pa. Naa pa si Garcia sa iyang laing unang termino. Mao pay pagsugod niya sa pagpahimutang sa mga proyekto nga iyang gilantaw makapalambo sa kinabuhi sa mga Sugboanon, labina ning panahon sa pandemic.
Nagsugod na usab siya sa pagpaayo sa mga karsada ug uban pang mga estruktura nga mopaluag sa kinabuhi sa mga Sugboanon ug mopalambo sa ekonomiya.
Ning mga proyekto nga iyang gisugdan, lisod pang kombinsihon ang gobernador sa pagdagan kay nailhan siya nga humanon ang mga proyekto, sama sa iyang unang tulo ka mga termino pipila ka mga tuig ang nakalabay.
Sa pag-asumer pa lang niya sa katungdanan human modaug sa 2019 elections, gipaspasan gilayon niya ang pagpatuman og mga proyekto, apil na gani ang sustainability sa pagkaon human magsugod ang pandemic.
Gawas pa, naa karon si Garcia sa lig-on kaayong posisyon tungod sa grabeng suporta kaniya sa publiko taliwa sa maayong pagdumala niya sa Kagamhanan sa Lalawigan sa Sugbo ning pandemic. Gani, hangtod karon wa pay nangahas sa pag-atbang kaniya.
Kini tungod kay nakita sa ubang mga pulitiko nga milig-on og maayo ang liderato ni Garcia. Kon lig-on kini niadtong 2019, unsa na kaha karon nga nakasukad na siyag maayo? Samtang ang pwesto sa pagka senador medyo dako pag trabahuon.
Nasayod si Garcia niini, busa kuli kaayo nga molansad ang gobernador sa pagka senador. Tingali sa iyang katapusang termino, iya ning ikonsiderar. Sa pagkakaron, ang gobernador nasayod nga gikinahanglan kaayo siya sa mga Sugboanon. Nailhan siyang di mobiya og kaakuhan nga wa mahuman.