NAKAPASAR na ang tanang meat inspectors sa Department of Veterinary Medicine and Fisheries (DVMF) sa dakbayan sa Sugbo human sa ilang gipahigayong post examination kabahin sa ilang retooling seminar sa nakalabay nga adlaw.
Si Dr. Alice Utlang, hepe sa DVMF sa pagpakighinabi sa Sun.Star Superbalita nagkanayon nga wa nay nahagbong sa iyang mga meat inspector human sa post examination nga ilang gipahigayon.
Siya niingon nga nalipay siya sa resulta sanglit ang tanang 33 ka mga meat inspector sa siyudad pasado man sa grado nga ilang nakuha apan wa gihapon mapapas sa iyang panumduman ang 13 nga nangahagbong sa pre-test examination.
“Siyempre nalipay pero naa gihapon ang kaguol,” pasabot ni Utlang.
Ang hepe sa DVMF mapasigarbuhong mitug-an sa Sun.Star Superbalita nga ang tanang 33 ka mga meat inspector nakapasar. Sa 35 item-test sa ilang pasulit, 34 puntos ang pinakadako ug 21 ang pinakagamay nga mao usay passing percentage.
Si Utlang nisaysay nga iyang gipahimangnoan ang iyang mga meat inspector nga maningkamot gyud hilabi na sa gipahigayong pasulit sanglit iya mang gipasidan-an ang mga meat inspector nga kon sila di makapasar sa maong pasulit, ibalhin sila og trabaho o ba kaha e demote sa ilang position.
Kahinumduman nga niadtong Oktubre 7 nipahigayon sila og pasulit kabahin sa ilang trabaho apan nangahagbong ang 13 sa 33 ka mga meat inspector sa wa pa sugdi ang ilang retooling seminar. (PAC)