GIDEKLARAR na sa konseho sa Dakbayan sa Sugbo ubos sa state of calamity ang duha ka mga sityo sa Barangay Guadalupe nga naigo sa sunog sa miaging semana.

Kini naglangkob sa sityo Riverside ug Kana-as nga pulos mga sakop sa Brgy. Guadalupe.

Si Konsehal Rodrigo Abellanosa nga maoy nangamahan sa resolution nagkanayon nga ang apektadong mga pamilya nanginahanglan og mga pagkaon, sama sa packed lunch, bugas, canned goods, mga senina ug gamit alang sa pagpabarog pagbalik sa ilang mga balay.

Kini subay sa pakisusi sa Department of Social Welfare and Services sa siyudad aron mahatagan og igong ayuda ang mga biktima sa katalagman.

Subay sa maong imbistigasyon, una nang gideklarar sa Cebu City Disaster and Coordinating Council (CCDCC) ilawom sa state of calamity ang dapit nga mao usab ang basehanan sa konseho.

Kini aron mahatag ngadto sa mga nasunugan ang mga hinabang.

Gikutlo usab sa konsehal ang nalatid sa RA 7160 o mas nailhan nga Local Government Code of 1991 nga nag-ingon diha sa Section 324 (d) “provides that 5% of the estimated revenue from regular sources shall be set aside as annual lump sum appropriation for relief, rehabilitation and other works and services in connection with calamities which may occur during the budget year.”

Kahinumduman nga niadtong September 18, ang sityo Riverside ug Kana-as diha sa Brgy. Guadalupe naigo sa sunog. (PAC)