MASUBLI na usab ang kasungian tali nila ni Gob. Gwen Garcia ug Daanbantayan Mayor Ma. Luisa Loot.

Kini human masayri ni Garcia nga mibiyahe sa China si Loot nga wa mananghid sa iyang buhatan isip labing taas nga opisyal sa lalawigan sa Sugbo.

Niadtong Biyernes, usa ka unsigned letter ang nadawat ni Atty. Rory Jon Sepulveda, Capitol consultant on information, nga nagpahibawo labot sa biyahe ni Loot sa China nga giingong wa managhid sa buhatan sa gobernador.

Daling gimandoan ni Garcia si Sepulveda pag-imbestigar bahin niini.

Matod ni Garcia nga ubos sa Section 96 sa Local Government Code kinahanglan nga mananghid sa Office of the Governor ang mga mayor sa component cities ug kalungsuran kon mobiyahe gawas sa lalawigan.

Ang gobernador nagkanayon nga wa siya makahinumdum nga niduaw sa iyang buhatan si Loot ug nananghid nga mobiyahe sa China.

Nakahinumdom hinuon siya nga nananghid ang anak ni Loot nga si 4th District Provincial Board Member Sun Shimura nga mobiyahe sa China apan di alang sa iyang inahan.

Sumala ni Sepulveda sa higayon mapamatud-an nga nakalapas sa Local Government Code si Loot mag-atubang kini og disciplinary action diin mahimo kini’ng masuspenso.

Sa iyang bahin, dihang nahinabi sa Sun.Star Superbalita, si Loot niklaro nga nananghid siya sa Dept. of Interior and Local Government (DILG)-7 labot sa iyang usa ka semana nga biyahe sa China sugod niadtong Oktubre 2.

Si Loot nagkanayon nga niadtong Septembre 13 naka-file siya og leave ug nadawat kini sa Office of the Governor.

Nagtuo ang maong mayor nga posibleng mga kaatbang sa pulitika sa ilang lungsod ang nagpadala sa unsigned letter sa buhatan sa gobernador.

Gidugang sa mayor nga gikan sa iyang kaugalingong bulsa ang gigasto sa pagbiyahe sa China uban sa iyang anak nga si Shimura.

Kahinumduman nagsugod ang kasungian nila ni Garcia ug Loot dihang napakyas ang Daanbantayan pag-apil sa Pasigarbo Festival niadtong Hulyo. (SCG)