Komentarista gisikop, napriso og 1 ka gabii

GIHULAGWAY sa usa ka komentarista sa radio nga blocktimer nga pagpang-harass ang pagdakop kaniya sa mga pulis sa miaging gabii tungod sa kasong libelo.

Ang warrant of arrest ni Jun Arigo gi-serve sa kapulisan alas 9:45 sa gabii atubangan sa Petron Gas station sa Barangay Lawa-an Uno, siyudad sa Talisay.

Apan si Provincial Board Member Thadeo Ouano niingon nga grabe na kaayo ang pagpakauwaw ni Arigo kaniya sa tulumanon niini sa radio.

Matod ni Arigo atol sa iyang tulumanon “Ponto de Vista” nga nga gituyo sa pag-serve Biernes sa gabii ang warrant of arrest aron di siya maka-pyansa sa kaso nga libelo nga gipasaka batok kaniya ni Ouano.

Nagkanayon si Arigo nga nakadawat siya og text sa numero 0999-715-9583 nagpaila nga “Lucy,” secretary sa usa ka kongresista sa wa pa mahuman ang iyang programa sa radio.

Kini nipahibawo nga may ihatag kaniya ang kongresista hangtod nga sila nagkasinabot nga mag-abot sa Petron gas station sa Lawaan Uno, Talisay City duol sa iyang gipuy-an.

Apan sa pag-abot ni Arigo sa dapit, diha nay naghuwat nga itom nga sakyanan ug wa magdugay niduol ang tulo ka mga tawo nga nipaila nga pulis ug nipahibawo nga aduna siyay warrant of arrest.

Siya gidala sa kapolisan paingon sa Mandaue City Police Office (MCPO) diin didto naghuwat ang mga sakop sa media.

“Karon ako pay naay warrant of arrest. Basin ugma kamo na pud ang makatagamtam sa pagpang-harass,” matod ni Arigo.

Siya nidugang nga ang warrant of arrest giluwatan niadtong Oktobre 7 niining tuiga ug nianang Oktobre 8 sa gabii gi-serve.

Gipadayag usab ni Arigo nga wa siya mauwaw nga siya gidakop sa kapolisan tungod sa kasong libelo kay kabahin kini sa iyang trabaho ug propesyon.

Nagduda si Arigo nga nakig-alayon kang Ouano ang kampo sa usa ka kongresista pag-set up aron siya masikop.

Samtang si Ouano nipasabot nga napugos siya sa pagkiha sa komentarista aron sa pagpahilom niini diha sa kahanginan sa pagluwat og mga pasangil batok sa kaniya.

Nakatulog ug usa ka gabii si Arigo sa bilanggoan sa Police Station II sa MCPO Office sa wa pa kini makapiyansa kagahapon sa hapon.

“Dili ko gusto nga tawgon og ‘onion skin’ (tungod sa pagsang-at og kiha) apan sobra na ang iyang pagdaot kanako,” matod ni Ouano.

Siya nipahinumdum nga ‘let’s be a responsible journalist. Di ta magpataka og istorya”.

Gisaysay niya nga gisigehan gihapon siya og bira ni Arigo diha sa kahanginan sa sibyaanang dyKC sa giingong nakadispalko og dakong kantidad sa Philippine National Bank (PNB) diin siya kanhi nag-alagad sa wa pa mosulod pagka-public servant.

Sigun pa sa pasangil nga mibiya gilayon si Ouano paingon sa Amerika ug sa iyang pagbalik sa nasod nakapalit na kini og upat ka franchise sa Jollibee food chains.

Hugtanong gipanghimakak sa opisyal ang maong pasangil sanglit nahimo siyang loyalty awardee sa PNB sulod sa iyang kapin sa 20 ka tuig nga pag-alagad sa banko.

Nipakita usab kini og certifications nga nagpamatuod nga wa siyay gipanag-iya nga food chains.

Ang maong mga kan-anan gipanag-iya sa iyang duha ka mga anak nga sila si Jonkie Ouano ug Emmarie ‘Lolypop’ Ouano-Dizon.

Nipasabot siya nga documented ang tanang commentaries ni Arigo diin usa sa recorded nga commentary nahitabo niadtong Septiyembre 28, 2009.

Gikuwestiyon ni Ouano ang pagpunay og bira ni Arigo kaniya niadtong panahon nga usa pa siya ka private citizen.

Nakagawas ra usab sa bilanggoan si Arigo kagahapon sa mga ala 1:00 sa hapon human nakapiyansa og P20,000 sa two counts of libel case.