10-10-10 gituohang swerte alang sa mga kandidato

NIDAGSA ang mga kandidato sa buhatan sa Commission on Elections (Comelec) aron mosang-at sa ilang certificate of candidacy (COC) kagahapong adlawa, Oktubre 10 kon 10-10-10.

Alang nila swerte ang among adlaw sanglit talagsa ra nga mahitabo ang pagpasaka sa sertipiko sa kandidatur mahiatol sa maong plastada sa bulan, petsa ug tuig.

Usa si Engr. Ivy Jean Adonis, kinsa unang higayon nga magpapili pagka barangay kagawad sa Poblacion Uno, sa lungsod sa Bansalan, Davao del Sur, nagdali sa pag-adto sa buhatan sa Comelec aron mosang-at sa iyang COC.

"Lahi man gud siya kay kini ang adlaw nga gipaabot sa kadaghanan kay talagsa ra ni mahitabo sa usa ka tuig," ni Adonis pa.

Dason niya swerte alang sa negosyo, trabaho, agimat, pagpamalit og mga kabtangan, pagsugod sa relasyon; samtang ang uban gituohang malas ang mao nga adlaw sanglit anaa sa negatibong kategorya, sama sa malas, salot, sakit, kagubot ug uban pa.

Sa Barangay Buenavista sa Bansalan si Kapitan Samuel Dicdican, nagkanayon nga wa siya moapil pagsang-at bisan magpasubli ug iyang gihuwat nga makumpleto sa iyang grupo ang ilang mga COC aron dungan nga ihatod sa Comelec.

"Nag-depende ra man na sa pagtuo sa tawo. Ang importante gyud ang kumpanya unya i-plastar nimo sa katawhan ang imong tinguha kon nganong magpapili ka," sumala ni Dicdican.

Sa Magsaysay, Davao del Sur, si Poblacion Barangay Captain Chona Seng nga nahinabi sa Sun.Star Superbalita sa telepono, nagbutyag nga karong adlawa sab siya maghatod sa iyang CoC ug wa siya niapil kagahapong adlawa.

"Kung sa China gyud ka swerte gyud ang 10-10-10 kay double 10 man na sa amoa. Pero kung babaye ka 11 gyud ang swerte," matod ni Seng.

"First day of the week ang Monday so meaning first day of work unya kung sa Rosary pa na siya mao na ang Joyful mystery," si Cheng pa kinsa magpasubli sab.

Ang ubang kandidato niadto pang Oktubre 8 nag-file og COC sanglit mao sab ang adlaw nga swerte alang nila.

Usa ka wa magpailang botante nagpahayag sab nga bisan unsa pang adlawa moduso sa iyang kandidatura ang usa ka pulitiko ang importante alang nila nga tinuod silang moserbisyo sa barangay ug dili kay mo-trabaho og laing kumpanya aron magdawat og dugang sweldo.

"Ang ako lang gyud nagpapili man sila so mo-serbisyo sila og tarong diha sa barangay dili kay magsige ra og agad-agad sa mga dagkong pulitiko," matod pa.

Sigon ni Edgardo Sadili, provincial election supervisor, nag-agad ra sila sa mga kandidato kon kanus-a moadto sa matag buhatan sa Comelec.

"Basta ang amoa lang di sila kaabtan og deadline karong Miyerkules kay aron di sab mi magkapuliki pag-entertain nila kay interviewhon pa man gud na sila," niya pa.

Matod ni Sadili sa inisyal nga datos 30 porsyento pa lang sa matag barangay sa Davao del Sur ang nipasaka sa ilang kandidatura.

Matapos ang pagsang-at og COC, banda alas 11:59 sa gabii karong Oktubre 13. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph